Avstriya Qızıl Xaç Cəmiyyətinin prezidenti Gerald Schöpferin rəhbərliyi ilə beş nəfərdən ibarət nümayəndə heyəti, Azərbaycan Qızıl Aypara Cəmiyyətinin icraçı katibi Bayram Vəliyev və Azərbaycan Qızıl Aypara Cəmiyyətinin (QAC) prezidentinin Fövqəladə Hallar üzrə müşaviri Elşən Səlimzadə QAC Sumqayıt şəhər bölməsində olublar. Qonaqları QAC Sumqayıt bölməsinin sədri, işçi və könüllü heyəti qarşılayıb.

Əvvəlcə qonaqlar bölmənin inzibati binası ilə tanış olub, görülən işləri əks etdirən fotostendə baxış keçiriblər. Daha sonra bölmənin fəaliyyətinə həsr olunmuş videoçarx nümayiş etdirilib və QAC Sumqayıt bölməsinin sədri Mətanət Məhərrəmova rəhbərlik etdiyi qurumun fəaliyyəti haqqında danışıb.

O, xüsusilə 2012-ci ildə Avstriya Qızıl Xaç Cəmiyyətinin "Əlil uşaqların sosial inteqrasiyası” layihəsi çərçivəsində birgə əməkdaşlığından söz açaraq, hazırda da həmin layihənin bölmə tərəfindən qismən də olsa davam etdirildiyini vurğulayıb. Qarşılıqlı diskusiya şəklində keçən görüşdə könüllülər özləri və könüllük fəaliyyətlərindən danışıblar, Avstriya Qızıl Xaç Cəmiyyətinin könüllüləri ilə təcrübə mübadiləsi aparmaq arzusunda olduqlarını bildiriblər.

Avstriya Qızıl Xaç Cəmiyyətinin prezidenti Gerald Schöpfer çıxış edərək bölmənin çoxşaxəli fəaliyyətindən məmnun qaldığını deyib, gələcək işlərində onlara uğurlar arzulayıb.