Son vaxtlar Sumqayıt şəhərinin nəqliyyatı sahəsində bir sıra işlər görülsə də, bununla yanaşı hələ də şəhər sakinləri bəzi marşrutların fəaliyyətindən razı deyillər və bu tip şikayətlərdən biri də 3 nömrəli avtobuslarla bağlıdır.
İqtisadi Zonalarının İnkişafı Agentliyi nəzdində Peşə Təhsil Məktəbinin tələbələrindən biri redaksiyamıza müraciət edərək şikayətini dilə gətirib: "Avtobus problemimiz artıq həll olunsun. İki aydan sonra qış gelir. Əgər avtobuslarda nasazlıq varsa, biz məktəbə necə gedib-gələcəyik? İqtisadi Zonalarının İnkişafı Agentliyi nəzdində Peşə Təhsil Məktəbinin tələbələri və müəllimləri avtobus problemi səbəbindən çətinlik çəkirlər. Artıq avtobus problemimiz həll olunmalıdır. Avtobusun olmamağı səbəbindən dərsə çox vaxt gecikirik. Elə vaxt olur ki, 1 saat avtobus gözləməli oluruq. Gələndədə dolu gəlir. Qış gələndə isə soyuqda avtobus gözləməli oluruq. Bu qədər haqsızlıq olmaz axı. Səhər-səhər 3 nömrəli avtobusla dediyim vəziyyətdə dərsə, işə gedən adamın psixologiyası pozulur, o adamın gördüyü iş, oxuduğu dərs də keyfiyyətsiz, faydasız olur. Xahiş edirik ki, avtobus problemi tezliklə həllini tapsın”.
Məsələ ilə bağlı Azərbaycan Yerüstü Nəqliyyat Agentliyi (AYNA) ilə əlaqə saxladıq. Qurumun mətbuat katibi Tural Orucov Xeberle.com-a açıqlamasında sözügedən marşrut xətti ilə bağlı monitorinq aparıldığını bildirib: "Vətəndaşlardan daxil olan müraciət əsasında AYNA-nın əməkdaşları tərəfindən H.Z.Tağıyev qəsəbəsi – Sülh küçəsi istiqaməti üzrə hərəkət edən 3 nömrəli müntəzəm marşrut xəttində monitorinq aparılıb. Daşıyıcıya sərnişin tələbatı nəzərə alaraq xəttə əlaqə nəqliyyat vasitələrinin cəlb edilməsi ilə bağlı tapşırıq verilib. AYNA tərəfindən monitorinqlər davam etdiriləcək”.
Elşən Yəhyayev
Xəbərdən istifadə edərkən istinad etmək vacibdir.
