Əmək və Əhalinin Sosial Müdafiəsi Nazirliyinin tabeliyində Sosial Xidmətlər Agentliyi tərəfindən ölkəmizdə yeni tətbiq olunmağa başlayan "Himayədar ailə” qayğı modelinin tanıdılması məqsədilə tanınmış şəxslərlə görüş təşkil edilib.
Görüşdə geniş izləyici kütləsi olan 20-yə yaxın aparıcı, bloger, influenser və ictimaiyyətdə tanınan digər şəxslər iştirak edib. Tədbirin təşkil edilməsində məqsəd bu qayğı modelinin cəmiyyətdə tanıdılması və geniş ictimaiyyətə çatdırılmasında nüfuzlu şəxslərin dəstəyindən istifadə edilməsi yolu ilə müəssisələrdə olan uşaqların ailə mühitində yaşamasının təbliğidir.
Görüş zamanı Agentliyin Valideyn himayəsindən məhrum olmuş uşaqlarla iş departamentinin müdiri Cavid Şahmalıyev mövzu haqqında geniş təqdimatlar edib. "Himayədar ailə” modelinin valideyn himayəsindən məhrum olmuş uşaqların xoşbəxt və qayğısız gələcəyi üçün önəmi vurğulanıb.
Təqdimatlardan sonra iştirakçılarla mövzu ətrafında müzakirələr aparılıb, onları maraqlandıran suallar cavablandırılıb.
Xəbərdən istifadə edərkən istinad etmək vacibdir.
