Kafe və restoranlarımızın bəzilərində terras və kabinet, digərlərində isə ümumiyyətlə bütün masalara görə depozit tələb olunur. Belə ki, restorana daxil olan müştərilərdən müxtəlif məbləğlərdə pul - yəni depozit istənilir. Çünki restorana qoyduğunuz əmanətin geri dönüşü yoxdur. Ya qoyduğunuz pul məbləğində yeyib-içməlisən, ya da o pulun başından keçməlisən.
Təəsüf ki, bu tip iaşə obyektlərinə Sumqayıt şəhərində rast gəlinir. Xüsusən şəhərin bulvar və Nəsimi adına dənizkənarı parkında fəaliyyət göstərən obyektlərdə belə əsassız tələblər qoyulur.
Təbii, bu hal müştəriləri narazı salmaya bilməz.
Maraqlıdır ki, restoranlar hansı əsasla depozit sistemi ilə işləyir? Ümumiyyətlə, depozit nə üçün alınır və bu restoranların depozit tələbi qanunidirmi?
Azad İstehlakçılar Birliyinin sədri Eyyub Hüseynov açıqlamasında bildirib ki, restorana çay içməyə, yaxud qəlyanaltı etməyə gələnlərdən depozit tələb edilməsi qanunsuzluqdur. Bu, müştərini depozit məbləğində xidmətdən yararlanmağa məcbur edir: "Biznes qurumu öz ərazisində qanuna zidd olmayan müəyyən şərtlər qoyur. Dəfələrlə buna bənzər məsələlərlə bağlı biz İqtisadiyyat Nazirliyinə müraciət etmişik, cavabları belə olub ki, öz ərazisində biznes qurumu qanuna zidd olmayan bu cür qaydalar qoya bilər”.
E.Hüseynov əlavə edib ki, belə qaydalar, sadəcə Azərbyacan üçün deyil və yalnız bizim ölkəmizin ərazisində qoyulmayıb: "Xarici ölkələrə səfərlər zamanı bu və buna bənzər, hətta daha betər hadisələrlə qarşılaşmışam. Xüsusən, otellərdə istehlakçı hüquqlarını pozan bir çox qaydalar, əcaib hallar görmüşəm. Məsələn, Amerikada prestijli otellərin birində qalırdıq. MDB qrupu ilə oradaydıq və mən qrup rəhbəriydim. Biz oteldən çıxanda hər birimizə 120 dollar əlavə pul hesabladılar. Səbəbini soruşanda bildirdilər ki, qrup üzvlərindən otaqlarda qoyulan içkilərə baxanlar olub. Müştəri içkiyə baxarkən şəkil çəkilib. Biz sübut etdik ki, baxsa da, müştəri onu içməyib. Hamımız istehlakçı hüquqlarını qoruyan təşkilatların nümayəndələriydik və tələb edilən həmin pulu vermədik. Argentinada isə oteldə qala bilməyimiz üçün qabaqcadan artıq pul götürdülər”.
Mövzu ilə bağlı Sumqayıt sakinləri arasında online sorğu apardıq. Əksəriyyət "Poseidon”, "Port West”, "Turan", "Ganjlik City”, "Park İnn”, "Pine Park" kimi restoranların adların qeyd ediblər. Rəylərdə qeyd edilib ki, xidmət ürəkaçan olmadığı halda "xidmət haqqı” tələb edən restoranlar da mövcuddur. Bəzi restoranlarda isə qiymətlərin süni artırıldığı da rəylər arasındadır. Həmçinin, restoranların əksəriyyəti post terminalın işləmədiyini, yalnız kartdan karta ödənişin mümkün olduğunu da bildiriblər.
Odur ki, növbəti mövzumuzda Sumqayıtda fəaliyyət göstərən kafe və restoranlarda post terminalların işləməməsi bəhanəsinə dair araşdırma aparacağıq.
Elşən Yəhyayev
