At həssas heyvandır və baş verə biləcək hadisəni hiss edərək onu öz narahatçılığı ilə bildirir. "Salam Azərbaycan” verilişində atçılıq idman növü haqda maraqlı reportaj hazırlayıb. 
Reportajı təqdim edirik:
Nə qədər ata yaxın olsan o da səni bir o qədər qəbul edər və hətta sanki səninlə danışar. Qarabağ atları ən qədim cinslərdəndir. Boyu bir metr yarım, rəngi qızılı kürən olan Qarabağ atları Qafqazda ən qədim at cinsidir. Bu atlar yüksək sürəti, çevikliyi və dözümlüyü ilə fərqlənir. 
Atası Sovqat, anası isə Albalı adlı qəhrəmanımız Alov da onlardan biridir. Adı kimi rəngə malik bu at cıdır meydanına çıxan kimi bir yerdə dayanmadı, çox dəliqanlıdır. Alov hər adama ona yaxınlaşmağa, onu çapmağa icazə verməz. Dəfələrlə yerli və beynəlxalq yarışlarda çaparlıq edən, 4 ildir ki, Alovun ən yaxın yoldaşı olan Zaur isə deyir ki, Alov kameranı görən kimi narahat olur.
Hazırda Azərbaycanda yüksək keyfiyyətli Qarabağ və Dilbaz, həmçinin Quba, Şirvan və digər yerli atlarla yanaşı ərəb, ingilis, türkmən cinslərindən olan atlar da saxlanılır. Onları yarışalara hazırlayan jokeylər isə xüsusi təlimlər keçirlər. Artıq 4 ildir ki bu işlə məşğul olan Pənahın fikrincə, at sürmək riskli olsa da onun verdiyi adrenalinə dəyər. 
Yarış atları gigiyenik qaydalara, təmizliyə riayət etməklə baytar nəzarəti altında saxlanılır. Hər gün çimizdirilən atlar üçün hətta xüsusi solyari də mövcuddur. Onların saçları da hər gün daranır. Atın ayağına ağırlıq verməsin deyə, yüngül olduğdu üçün nallarda daha çox alüminium materialdan istifadə olunur. Bir müddət sonra isə nal dəyişdirilir. Köhnə nal çıxarıldıqdan sonra uzanan dırnaq kəsilir, təmizlənərək formaya salınır, qırılmasın deyə üzərinə lak çəkilir.
Hazırda atçılıq bir idman növü kimi də Azərbaycanda inkişaf etməkdədir. Bu sahədə tez- tez atçılığın konkur növü, həmçinin polo üzrə idman yarışları təşkil olunur. Bu yarışlarda Alov kimi yüksək yer tutan atlar isə daha sonra beynəlxalq yarışlara dəvət alır. İndi Qarabağ atları təkcə Azərbaycanı deyil dünyanı gəzir. 
Amma vətən daşını, torpağını nə əvəz edər ki? Arzu edək ki, Alovun sağ- sola qaçdığı bu kiçık meydança da tezliklə Cıdır düzü ilə əvəzlənsin!  (anspress.com)