Paytaxtda bir neçə gün əvvəl Binəqədi rayonunda insan tələfatı ilə nəticələnən yanğından sonra Azərbaycan televiziyalarının əksəriyyətində minnətqoyma kompaniyasına start verildi. Bəzi kanallar özlərini operativ, birinci, əvəzsiz adlandırdığı halda, evində insanlar yananda və tüstüdən zəhərlənən vaxt efirlərində çal-çağırdan qulaq tutulurdu. Halbuki, dəhşətli yanğınla bağlı məlumatlar gələndə faciənin miqyasına görə, şou-musiqili proqramlar təxirə salına bilərdi. Amma nə oldu? Televiziyalar öz proqramında demək olar ki, dəyişiklik etmədi... Yaxud da faciənin sabahısı bəzi TV-lər proqramlarında dəyişiklik etsə də, bunu icitmaiyyətə bir minnət kimi sırımağa çalışdılar. Sanki bu televiziyalar Azərbaycanda fəaliyyət göstərmir və orada çalışanlar bu ölkənin vətəndaşları deyil. Və sanki bunlar çox böyük qəhrəmanlıq ediblər ki, millətin faciəli günündə qol götürüb oynamayıblar, hoppanıb-düşməyiblər...
"Belə hallarda tamaşaçının qəzəbinə səbəb olan, özündən çıxara biləcək verilişlərdən imtina olunmalıdır. Ona görə demək ki, mən əyləncəli verilişləri proqram setkasından çıxartdım və bunu da tamaşaçıya minnət kimi təqdim etmək yolverilməzdir. Qəbul edilmiş qayadalara görə belə olmalıdır və televiziyalar da bunu bilməlidirlər." Bunu media üzrə mütəxəssis Qulu Məhərəmli Analitik.az-a bildirdi. O, vurğuladı ki, əslində bu hadisə baş verən zaman əhali məlumatlandırılmalı idi: "TV-lərin xəbərlər proqramı efirə çıxmalı və məlumatları ictimaiyyətə çatdırmalı idi. Çünki həmin anda onların verdiyi məlumat cəmiyyət üçün çox maraq kəsb edirdi. Ondan sonra tədricən proqram setkasını müəyyən etməli idilər. Veriləcək veriliş hansı mövzuda olursa-olsun, o tamaşaçı üçün maraqlı deyil. Hadisələrin inkişafını canlı şəkildə işıqlandırmaq lazım idi. Həmin gün proqramda həddindən artıq qıcıqlandırıcı verilişlər vermək olmazdı."
Millət vəkili Zahid Oruc isə deyir ki, Azərbaycanda efir məkanının fors-major situasiyaya və ya qeyri-təbii hadisəyə çevik uyğunlaşma bacarığı və milli proqram siyasəti olmalıdır. Onlar auditoriyalarının birinci növbədə Azərbaycan xalqı olduğunu unutmalı deyillər: "Televiziyalar siyasi quruluş formasından asılı olmayaraq, hər zaman millət qurucusu rolunda çıxış edir. Onlar hər kəsin evinə daxil olur, ailələr üçün tərəf müqabilinı, həmsöhbətə çevrilir və insanlar həmin sehrli ekranın cazibə dünyasına daxil olmağa, necə deyərlər, efir vasitəsilə idarə olunmağa meyillidilər. Buna görə sözün qüdrətindən faydalanmaq lazımdır. Azərbaycan Prezidenti İlham Əliyev ən ağır dönəmlərdə tək dinc və təhükəsizlik dövründə deyil, həm də ağır anlarda, təhlükəli proseslər baş verəndə də bütün o dərdləri, ağrını üzərinə götürən və bununla bərabər millətin gələcəyə doğru aparmaq qüdrətini ortalığa qoyur. Əgər belədisə hər kəs o cümlədən media məkanı da bu prinsipi rəhbər tutaraq hərəkət etməlidir. Vətəndaş düşüncələrindən, halından, onun ümumi ruhundan irəli gələn yaşantıları mümkün qədər tanımaqla bərabər televiziyaların xüsusi konsepsiya və komandası olmalıdır ki, onlar cəmiyyət üçün peşəkar həkim, müdrik müəllim, güclü sərkərdə və sadiq dost ola bilsinlər. Ona görə də mən Azərbaycan televiziyalarından milli həyatımıza, maraqlara bağlı daha ciddi dəyişikliklər gözləyirəm. Hesab edirəm ki, bu, insanlardan, cəmiyyətdən gələn tələbdir. Onlar öz istədikləri kimi ola bilməzlər”.
R.ZEYNALLI
(Analitik.az)
Xəbərdən istifadə edərkən istinad etmək vacibdir.
