Bu yazım şirkətlərin marketinq qərarlarını verənlərədir.

Mən PR-çıyam. Bir az sadə desək, şirkətlər və media arasında bağlayıcı. Bu sahəyə uzun illər əvvəl jurnalistikadan gəlmişəm. Bu peşənin bütün məsuliyyətini, çətinliyini hər zaman hiss etmişəm.

Bilirik ki, medianın ayaqda qalması üçün onun maddi vəziyyətinin yaxşı olması mütləqdir. Çünki yalnız peşəkarları olan media uzun müddət yaşayır - peşəkarların qiyməti yüksək olduğu üçün.

Əməkdaşlıq etdiyim media rəhbərləri və nümayəndələri bunu bilir – bircə dənə də olsun reket material verən media ilə əməkdaşlığı dayandırıram. Bəlkə də bu, həmin media üçün heç nədir, amma mənim üçün prinsipdir. Özümə böyük rahatlıq hissi verən prinsip.

Artıq bir müddətdir ki, yeni bir qərar da vermişəm. Sizi də buna - gələcəyimiz, xalqımızın genofondu naminə mənimlə həmrəyliyə çağırıram: çıxın yüksək reytinqli, amma bu reytinqi qeyri-peşəkar cazibəli başlıqlarla yazılmış seksual/şok xəbərlər, səviyyəsiz əyləncələr, məişət faciələrindən yaradılmış şoularla yığmış bütün mediadan.

Tək hisslərə qapılmaqla verilən tövsiyə deyil bu. Həm də peşəkar məsləhətdir. Birincisi, həmin verilişlərin izləyiciləri sizin hədəf kütlə deyil. Çünki onlar – həmin cahil kütlə - "opinion maker” deyil, "followerdir”. Bu məlumat daha səviyyəli yerdən daha səviyyəli, rəyi sayılan insanlara çatdırılsa, onların təsir gücü qalıcı olacaq. İkincisi, reytinqi şişmiş medianın qiymətləri də şişmiş olur – pulunuz cibinizdə qalacaq. Üçüncüsü isə nüfuzunuz güclənəcək – sizi qan-qada, seksual işgəncələr, səviyyəsiz söhbətlərlə deyil, daha sanballı məfhumlarla xatırlayacaqlar.

İşlədiyiniz media siyahısına dərhal əl gəzdirin. Yoxsa özünüzün də səviyyəsiz saydıqlarınızın sizi öz təsirləri və səviyyələrinə salmasına səbəb olursunuz. Çünki onların bütün reytinq hoqqaları sizin pulunuzu öz ciblərinə ötürməkdir. Verməyin o pulu onlara. Qoyun ölsünlər! Ya da peşəkarlaşsınlar.

Afət Yaqubova

Lent.az