Bildiyiniz kimi, Sumqayıt şəhərini Saray qəsəbəsi ilə birləşdirən və 1970-ci illərdə inşa edilmiş körpü sökülərək yenidən tikilir. Artıq bir neçə gündür ki, bununla bağlı söküntü işlərinə başlanılıb.
Azərbaycan Avtomobil Yolları Dövlət Agentliyi tərəfindən uzunluğu 100 metr, 6 aşırımdan ibarət yeni körpünün tikintisi üçün əraziyə lazımi sayda canlı qüvvə və texnika cəlb edilib.
Sumqayıtda körpünün yaxınlığında "Daş bazarı" kimi deyilən ticarət məkanının yerləşməsi isə ərazidə çalışan obyektlərin fəaliyyətində durğunluq yaradıb. Xeberle.com-un əməkdaşı ərazidə olub. Satıcılar körüpünün bağlandığı gündən satışın həcminin aşağı düşdüyünü bildirirlər. Bu səbəbdən Sumqayıtın ən böyük tikinti bazarında durğunluq yaşanır. Onlar eyni zamanda, verilən alternativ yolun da maşınların hərəkəti üçün əlverişli olmadığını bildiriblər.
Buna baxmayaraq, obyekt sahibləri bu təxirəsalınmaz addımın hər kəsə gərəkli olduğunu, təhlükəli vəziyyətə düşən körpünün bərpa olunması zərurətini nəzərə alaraq, cənab Prezidentə təşəkkür ediblər. Onlar tezliklə körpünün təmirinin bitməsini gözləyirlər.
Saraydan Sumqayıta gedib-gələn vətəndaşlar isə verilən alternativ yolun onlara rahat olmadığını, "Yaşıl dərə" yaşayış massivi ərazisindəki yeraltı tunelin çox dar olduğunu, böyük tıxaclar yaratıdığını bildiriblər.
Qeyd edək ki, söküntü və təmir işləri ilə əlaqədar AYNA tərəfindən ərazidə müntəzəm sərnişin daşımalarını yerinə yetirən 8 avtobus marşrutunun hərəkət sxemi də müvəqqəti olaraq dəyişdirilib. Həmçinin vətəndaşların Sumqayıt şəhərindən Xırdalan şəhərinə birbaşa gedişlərinin təmin edilməsi məqsədilə 505 nömrəli müntəzəm marşrutun müvəqqəti olaraq başlanğıc dayanacaq məntəqəsi Koroğlu küçəsi (Sumqayıt şəhəri, dairənin yaxınlığı) müəyyən edilir.
Xəbərdən istifadə edərkən istinad etmək vacibdir.
