Məlum yanğın hadisəsi xəbərinin acısı keçməmiş qəfildən əsgər ölümü hamımızı sarsıtdı. Mayın 22-də Babaşovlar ailəsinə bu bəd xəbər veriləndə yaxınları şoka düşdü. Necə yəni, 23 yaşlı Tapdıq, iki ayın əsgəri pəncərədən yıxılıb, tibbi müdaxiləyə baxmayaraq həyatdan köçüb? Yaxınları ölüm xəbərinin acısıyla yanaşı müəmmalı yıxılma məsələsi ilə bağlı cavablar axtarırdılar. Ailə yaxınları əsgərin günün günorta çağı pəncərədən yıxılıb ölmə məsələsinə heç cür inanmadılar.
Bu gün mərhum gəncin ölümünün 4-cü günüdür. Şamaxıda torpağa verilən əsgərin xalasıoğlu Cavid Hacıbəyli doğmasının şübhəli ölümü ilə bağlı narahatlıqlarını bildirib. Əvvəlcə mərhum xalasıoğlu haqqında məlumat verən Cavid, onun BDU-nun tarix fakültəsinin məzunu, savadlı tarixçi, vətənpərvər gənc, türkçü olduğunu deyib: "Əsgər olmağa tələsirdi, həvəslə getmişdi. İki ay idi hərbi xidmətə başlamışdı. Fövqəladə Hallar Nazirliyinin tərkibindəki hərbi hissədə öz vəzifəsini yerinə yetirirdi. Vəziyyəti barədə pis heç nə eşitməmişdik. Qəfil ölüm xəbəri bizə çox pis təsir göstərdi. Bizə xəbər verəndə şöka girdik. Anası havalandı. İndi də özünə gələ bilmir. Sağ-salamat əsgər olan birisi heç bir hərbi vəziyyət olmadan necə ölə bilərdi? Hərbi hissədən deyiblər ki, binanın 4-cü mərtəbəsindən yıxılıb. Amma həqiqəti gizlədirlər, hadisə necə olub, deyən yoxdur. İstəsələr tapa bilərlər, hər şey əllərindədir. Bir saatın içində təhqiqat aparıb bu hadisənin baiskarlarını tapmaq olar. Günün günorta çağı əsgər ölür, hələ rəsmi orqanlar bunu araşdırıb ictimaiyyətə və ailəsinə heç bir məlumat verməyib. Bilirəm ki, hadisə ilə bağlı məcbur araşdırma aparılıb, bəlkə də həqiqət aydındır, ekspertizada da olub. Amma hələ ki, nəticə yoxdur, bizə dəqiq heç nə deyilməyib.”
Cavidin sözlərinə görə, verilən ilkin məlumata əsasən Tapdıq ehtiyatsızlıqdan pəncərədən yıxılıb, xalasoğlunu xəstəxanaya çatdırıblar, əməliyyat olunub, amma komaya girən əsgəri həyata qaytara bilməyiblər.” "Bu ölüm hadisəsinə qəfil hadisə kimi baxa bilmirik”-deyə, Cavid bildirib. "Fikrimizcə, cinayət FHN-nə məxsus hərbi hissədə baş verib, özü də şəhərin mərkəzində, gündüz vaxtı əsgər ölür, hər kəs susur. Axı hadisə rəsmi dövlət strukturunun binasında baş verib, ora poliqon deyil, meşə deyil, dağ-dərə deyil ki, ört-basdır eləsinlər. Yaxşı bilirik ki, FHN qapalı qurum olduğu üçün oradan düzgün məlumat almaq da mümkün deyil, şahidlər olsa belə, bunu ancaq ədalətli araşdırma və ədalətli məhkəmədə bilmək olar.”
"Açığını desəm, bu hadisə düzgün araşdırılıb tapılmayana qədər heç kimin sözünə inanmırıq. Allah bizə səbir versin! Ailəmiz böyük faciəni yaşayır. Ümidimizi itirmirik, itcimaiyyətin, ailəmizin həqiqəti bilməyə haqqımız var. Ədalət gözləyirik!”
Maraq doğuran bir fakt var ki, Cavid və ailəsi mərhum əsgərin qollarında, biləklərində kəndir izlərinin, göyərmiş ləkələrin olduğunu deyirlər. Onların fikrincə, Tapdığın ölümündən qabaq qolları bağlanıb, işgəncə verilib, sonra isə pəncərədən yerə itələnib. Hər halda bu doğmalarının fikirləridir. Ağrılısı odur ki, nə qədər həqiqət ortaya çıxsa da, itən, itirilən geri qayıtmayacaq. Onu da qeyd edək ki, mərhum əsgər BDU-nun tarix fakültəsinin seçilən, sevilən tələbələrindən olub. Əsgərin ölümündən kədərlənən tarix fakültəsinin dosenti, tanınmış tarixçi Altay Göyüsöv Tapdıq haqqında fikirlərini bölüşüb. "Tapdığın ölümü pis təsir elədi mənə. Yer tapa bilmirəm özümə. Mən ümumiyyətlə, onunoxuduğu potoku, dərs dediyim o qrupu çox sevirəm. Tapdıq oxuya-oxuya həm də işləyirdi. Çox mərd gənc idi. Allah rəhmət eləsin, yaxınlarına səbr versin! Dinclikdə bu qədər əsgər ölümü olarmı? amımız acizliyimizlə cinayətkarıq.”
Ağrılı məqam odur ki, mərhum Tapdıq Babaşov vaxtilə 2013-cü ildə "Əsgər ölümlərinə son” adlı etiraz aksiyasının iştirakçısı olmuşdu. İndi onun özü sirli ölümün qəhrəmanına çevrilib. Allah yaxınlarına səbir versin! Son məlumata görə, mərhum əsgərin anası xalqa səslənib, "Vətəni sevmək günahdırmı?”, deyib. Acılı ana övladının ölümünün obyektiv araşdırımasını tələb edir. (analitik.az)
Xəbərdən istifadə edərkən istinad etmək vacibdir.
