Sumqayıt Regional Ədliyyə İdarəsində təşkil olunmuş anım mərasimində Azərbaycanın suverenliyi, azadlığı və ərazi bütövlüyü uğrunda canlarından keçmiş Vətən övladlarının əziz xatirəsi bir dəqiqəlik sükutla yad edilib.1990-cı il 20 Yanvar hadisələrinin respublikamızın müstəqilliyi yolunda ilk dönüş nöqtəsi olduğunu qeyd edən idarənin rəisi, baş ədliyyə müşaviri Eyvaz Məmmədov həmin günün heç zaman unudulmayacağını söyləyib. Qazandığımız tarixi Qələbə ilə Birinci Qarabağ müharibəsi, 44 günlük Vətən müharibəsi şəhidlərinin, eləcə də suverenlik və azadlıq yolunda canlarını qurban vermiş 20 Yanvar şəhidlərinin qisaslarının alındığını, ruhlarının rahatlıq tapdığını bildirib. Əldə etdiyimiz şanlı Zəfərə görə möhtərəm Prezident, Müzəffər Ali Baş Komandan cənab İlham Əliyevə, qanları ilə tarix yazan şəhidlərimizə, sağlamlıqlarını itirən qazilərimizə minnətdar və borclu olduğumuzu diqqətə çatdırıb.
İdarə rəisi tədbirə dəvət olunmuş 20 Yanvar faciəsində həlak olanların ailə üzvləri və hadisə iştirakçıları ilə fərdi söhbətlər aparıb, onların qayğı və problemləri ilə maraqlanıb.
Bir daha vurğulanıb ki, 1990-cı il yanvarın 19-dan 20-nə keçən gecə birbaşa Sovet rəhbərliyinin əmri ilə qoşun hissələri Bakıya və Azərbaycanın bir neçə rayonuna yeridilmiş, dinc əhali ağır texnikadan və müxtəlif tipli silahlardan atəşə tutularaq kütləvi qətlə yetirilmişdir. Azərbaycan xalqının başına gətirilən qanlı faciəyə ilk siyasi-hüquqi qiymət verən, təhlükələrdən çəkinməyərək Sovet hakimiyyətinin bu cinayətkar əməlinə etiraz edən Ümummilli Lider Heydər Əliyev olmuşdur. Ulu Öndər xalqın təkidli tələbi ilə ikinci dəfə hakimiyyətə qayıtdıqdan sonra 20 Yanvar şəhidlərinin xatirəsinin əbədiləşdirilməsi ilə bağlı bir sıra mühüm qərarlar vermişdir. Ümummilli Liderin bu siyasəti hazırda möhtərəm Prezident cənab İlham Əliyev tərəfindən yüksək səviyyədə davam etdirilir.
Mərasimdə iştirak edən şəhid ailələri və qanlı yanvar qırğınlarının iştirakçıları onlara göstərilən diqqət və qayğıya görə dövlətimizin başçısı İlham Əliyevə və Birinci vitse-prezident Mehriban Əliyevaya minnətdarlıqlarını bildiriblər.
"SUMQAYIT”
Xəbərdən istifadə edərkən istinad etmək vacibdir.
