Onu hamımız çox istəyirik. Həmişə vicdanlı, qərəzsiz mövqeyi ilə fərqlənib, elə indi də elədir. Televiziyalarımızla bağlı hansısa məsələ barədə düşünəndə, o dəqiqə ona müraciət edirik. Bu gün "Bir qadın soruşur”un suallarını ustad, professor Qulu Məhərrəmli cavablandırır.

- Həyat yoldaşınızdan qorxursunuz?

- Durub desəm ki, qorxmuram, deyəcəklər, lovğalanır. Qorxmağı da hər kişi etiraf  edə bilmir. Məncə, kişilərin böyük qismi çox vaxt xanımlarından çəkinirlər, ağıllı kişilər bu çəkinməyi qorxmaq kimi qələmə verməklə çox şey udurlar. Əslində, normalda ailə münasibətləri qorxuya, çəkinməyə  deyil, qarşılıqlı hörmətə əsaslanmalıdır.

- Deyəsən , xanımınız filologiyada sizdən güclüdür?

- Siz filologiya deyəndə yazıb-pozmağı, mətn tərtib etməyi və dil qaydalarını bilməyi nəzərdə tutursunuzsa, həqiqətən, o güclüdür. Ümumiyyətlə, uzun illər qəzetdə çalışanların fərqli yazı mədəniyyəti və fərqli qavrayış tərzi olur. Bizim xanım da uzun illər "Bakı”, "Baku” qəzetlərində çalışıb, indi də Ombudsman Aparatında mətbuat katibidir, həm də yazıçılığı var. Yəni, sırf filoloji düşüncənin daşıyıcısıdır.

- Heç deyiblər ki, siz mogikansınız?

- Ara-sıra bəzi həmkarlarımdan belə ifadələr eşidirdim və düzü, çox sıxılırdım. Təbii ki, bunu deyənlər fikirlərini ciddi şəkildə əsaslandırmağa çalışırdılar. Amma mən 30 il çalışdığım televiziyadan gedəndə "Zerkalo” qəzeti belə bir başlıq vermişdi: "Sonuncu mogikan Az.TV-ni tərk edir”.

-  Jurnalistikada siz güclüsünüz, yoxsa Zeynal Məmmədli?

- Məncə,  jurnalistikada biz hər ikimiz güclüyük, amma Zeynal Məmmədlini bir ustad, pedaqoq və  treninq aparıcısı, müəllim kimi daha güclü hesab edirəm.

- Ən yaxın düşməniniz kimdir?

- Adətən, insanın ən qatı düşməni onun ən yaxın dostu və ya yaxın hesab etdiyi adam olur… Amma məcazi mənada mənim ən yaxın düşmənim VAXTdır, onu heç cür dayandırmaq və ram etmək mümkün deyil.

- Xanım tələbələrinizdən heç sizi sevən olub?

- Auditoriyaya girən müəllim üçün müqəddəs bir sərhəd var, onu həmişə qorumalıdır. Bu sərhəd mənim üçün ikiqat müqəddəsdir. Ümumiyyətlə, tələbə xanımlara başqa gözlə baxmaq əxlaqlı adamın ağlına belə gəlməməlidir.

- Şorgöz kişilərə necə baxırsınız?

- Qadın düşkününə, qadınla davrana bilməyənə, hər yoldan ötən üçün ağzının suyunu axıdan kişiyə kim yaxşı baxar ki?..

- Nəyə görə bəzi kişilər nikahdan kənar əlaqələri haqqında danışmaqdan çəkinirlər?

- Mən belə kişilərə böyük rəğbətlə yanaşıram, düz eləyib danışmırlar, o şey ki, iki şəxsə aiddir, bunu başqalarına və başqalarının yanında danışmaq əclaflıqdır. Bir diktor var idi, kişi məclisində qızlar və qadınlarla sevgi macəralarından danışmağı xoşlayar, bəzən də müəyyən şeyləri uydurar və hətta bununla tərbiyəsizcəsinə lovğalanardı da.  Ona görə də mən bu adam olan məclislərə getməməyə çalışırdım.

- Xoşunuza gələn xanımın parametrlərini deyə bilərsiniz? Yəni çekisi, boyu...

- Əlbəttə, qadının zahiri görünüşü, müəyyən cazibəsi olsa, yaxşıdır. Mənim üçün cəlbedici olan daha çox qadının ünsiyyət mədəniyyəti, intellekti, kişi ilə davranışı, güzəştə gedə bilmək böyüklüyü, bir də adamı yola verə bilməsi və səmimiyyətidir.

- Hansı ordeni almaq istərdiniz?

- Heç bir ordendə və mükafatda gözüm yoxdur, məncə buna can atmaq adamları çox balacalaşdırır. Düzünü deyim ki, rəsmi yerlər istisna olmaqla, sinəsində orden, medal və ya döş nişanı gəzdirən adamlar məndə çox əcaib, xoş olmayan hisslər oyadır.

- Tamaşaçı üçün darıxmamısınız?

- Mən bəzi tamaşaçılarımla həyatda və sosial şəbəkələrdə ara-sıra görüşürəm, mənim tamaşaçı təbəqəm artıq ərimək üzrədir. İndi tamaşaçıların zövqü korlanıb, bilik və mədəni səviyyəsi çox aşağı düşüb.

- Çexovla yola gedirsiniz?

- Çexov sevdiyim yazıçılardandır, yəqin ki, üslubuna və yazıçı tərzinə görə Nazim Hikmət də əbəs yerə onun vurgunu olmayıb. Onun qadın qəhrəmanları bir az Anna Kareninaya bənzəsələr də, psixoloji yüklərinə, həyata baxışları, sevgiləri və fədakarlıqları ilə fərqlənirlər. Məsələn, mən həyatda hələ Çexovun "Naməlum adamın hekayəti” əsərindəki baş qəhrəmana bənzəyən heç bir qadın görməmişəm.

- Böyük jurnalist kimi, gənc jurnalistin sualları xoşunuza gəldi?

- Rubrikanızın adı yaxşıdır, qadının verdiyi suallara cavab vermək xoşdur, hərçənd ki, həyatda qadınların suallarına cavab vermək ciddi ağıl və böyük səbr tələb edir. Suallarınız da ümumən pis deyil, amma bəzi xətalı sualları verməmək də olardı…

- Qulu Məhərrəmli öz xatirələrini yazsaydı, birinci cümləsi nə olardı?

- Həyatın üzü çox sərtdir, belə həyatda rahat yaşamaq mürəkkəbdir, amma insan xisləti bunlardan daha mürəkkəbdir. (atv.az)