"Bu gün saat 10-da adi ipoteka kreditləri üzrə müraciətlərin qəbuluna start verilməli idi. Yəni, İpoteka və Kredit Zəmanət Fondu məhz bu saatda ipoteka kreditləşməsi məqsədilə müvəkkil banklara ipoteka kreditlərinin verilməsi üçün limitlərə müraciətləri qəbul etməli idi. "Verilməli idi”, "etməli idi” sözünü ona görə qeyd edirəm ki, iştirakçıların xeyli hissəsi prosesin baş tutmadığını bildirirlər”.
Xeberle.com məlumat verir ki, bunu İKT üzrə ekspert Osman Gündüz sosial şəbəkə hesabında yazıb. Onun sözlərinə görə, müzakirələr, şikayətlər hələ də davam edir:
"Bununla bağlı rəsmi resursun saat 10-da edilən müraciətlərə cavab vermədiyi, seçimin mümkün olmadığı, ümumiyyətlə müraciətin mümkün olmadığı və sistemin çökdüyü bildirilir. Sonradan daxil olduqda isə limitlərin bitdiyi qeyd edilib. Müraciətlər "Elektron ipoteka və kredit zəmanət” sistemi üzərindən "SİMA Token” və ya "Asan İmza” vasitəsilə həyata keçirilir. İstifadəçilər İpoteka və Kredit Zəmanət Fondunun sosial media hesablarında bununla bağlı müzakirələrdəki rəylərinin silinməsindən, prosesin gedişində Fondla əlaqə saxlamağın mümkün olmadığından da şikayətlənirlər”.
O.Gündüz baş verənlərin təəssüf doğurduğunu söyləyib: "Dövlət xidmətlərinin reallaşmasında texnologiyaların tətbiqi insan amilinin minimuma endirilməsi, şəffaflıq baxımından effektiv olsa da, bütün bunlar sonda vətəndaş məmnunluğuna gətirib çıxarmalıdır. Əgər bu baş vermirsə, onda demək haradasa səhvlərə, qüsurlara yol verilib. Düşünürəm ki, Fond baş verənlərlə bağlı ağlabatan açıqlama verməlidir. Problemin haradan qaynaqlandığına (sistemin özü ilə, daxil olmaqla, bankların seçimi ilə bağlı və s), insan amili ilə bağlı sui-istifadə risklərinə, kiber hücumla əlaqədar məsələlərə aydınlıq gətirməlidir. Şəffaflıq, ictimai nəzarət üçün imkanlar yaradılmalıdır. Aidiyyəti dövlət qurumları və müstəqil ekspertlərinin prosesin gedişində iştirakı təmin edilməlidir. Rəqəmsal xidmətlərin keyfiyyətinə və təhlükəsizliyinə cavabdeh qurumlar, RİNN, İRİA, XRİTDX bu məsələni diqqətdə saxlamalıdır. Daxil olan müraciətlərin emal olunması ilə bağlı statistikanı açıqlamaq faydalı olardı.
Fond uğurlu olan ilk və son müraciətlərlə bağlı məlumatları ağlabatan formada açıqlamalıdır. Sabah saat 10-da isə güzəştli ipoteka kreditləri üzrə müraciətlərin qəbuluna start veriləcək. Ümid edirəm Fond prosesin gedişinə şəffaf nəzarət imkanlarını gücləndirəcək və müraciətlərin problemsiz qəbulunu reallaşdıra biləcək”.
Xəbərdən istifadə edərkən istinad etmək vacibdir.
