Göründüyü kimi, ölkədə qarlı hava şəraiti davam edir. Buzlu yollar və sürüşmə riski nəzərə alınaraq diqqətli olmaları və təhlükəsizlik qaydalarına riayət etmələri tövsiyə olunur. Məhz, bu səbəbdən ictimai nəqliyyatın hərəkətində gecikmələr müşahidə olunur.
Xatırladaq ki, 21 fevral tarixində Kəskin hava şəraiti ilə əlaqədar təhlükəsizliyin təmin edilməsi məqsədilə bu gün Bakı şəhəri və Abşeron rayonu ərazisində avtobuslar saat 21:30-dək fəaliyyət göstərirdi.
Görəsən, Bakı-Sumqayıt və Bakı-Saray ekspress avtobuslarının qrafikində hər hansısa dəyişiklik olunacaqmı?
Məsələ ilə bağlı Azərbaycan Yerüstü Nəqliyyat Agentliyi ilə (AYNA) əlaqə saxladıq. Qurumun mətbuat xidmətindən Xeberle.com-a bildirilib ki, ölkə üzrə avtobuslar adi qrafik üzrə işləyəcək, hər hansısa dəyişiklik olunmayacaq:
"Qarlı və şaxtalı hava şəraitində ictimai nəqliyyatın fasiləsizliyi təmin edilib və əhalinin xidmətindədir.
Sərnişindaşımada xidmət göstərən sürücülər sürüşmə ehtimalı olan enişli-yoxuşlu yollarda, buzlu döngələrdə, körpü və yol ötürücülərində daha diqqətli olmaları, hərəkət sürətinə nəzarət etmələri, ara məsafəsi saxlamaları və baş verə biləcək yol-nəqliyyat hadisələri ilə bağlı risklərin daha çox olması barədə təlimatlandırılıb.
Hərəkət iştirakçısı olan sərnişinlərdən də təhlükəsizlik qaydalarına riayət etmələri xahiş olunur.
Avtobuslar adi qrafik və sxem üzrə fəaliyyət göstərir. Hava şəraiti ilə əlaqədar bəzi xətlərdə avtobuslarası intervallarda artım müşahidə edilə bilər.
Qarlı hava şəraitində, xüsusən də müxtəlif enişli-yoxuşlu ərazilərdə avtobusların hərəkətində məhdudiyyətlər yarana bilər. Sərnişinlərdən bunu anlayışla qəbul etmələri xahiş olunur.
Qeyd edək ki, nəqliyyat vasitələrinin çətinliklə üzləşdiyi ərazilərdə aidiyyəti qurumlarla birgə yol örtüyünün qardan təmizlənməsi və yolun açılması istiqamətində müvafiq işlər görülür".
Qeyd edək ki, ekspress avtobusların səhər saatlarında Sumqayıtdan ilk çıxış vaxtı saat 5:50, Bakıdan ilk çıxış vaxtı isə saat 6:20-dir. Axşam Bakıdan son çıxış vaxtı 23:00, Sumqayıtdan son çıxış vaxtı isə 22:30-dur.
Elşən Yəhyayev
Xəbərdən istifadə edərkən istinad etmək vacibdir.
