Hər kəs bir ömür yaşayır. Kiminin həyat yolu hamar, rahat, kiminin isə daşlı-kəsəkli olur. Elə ömür sürəsən ki, haqqında ancaq xoş sözlər deyilsin. Gülnaz xanım da enişli-yoxuşlu, çətinlik və zəhmətlə dolu bir ömür yaşayır. İşindən zövq alır, zəhməti, bacarığı ilə hörmət qazanmaq istəyir.
Qusar rayonunda qulluqçu ailəsində dünyaya göz açan Gülnaz Səfərovanın bu günlərdə 70 illik yubileyi qeyd edildi. Jurnalist olmaq arzusu ilə yaşayan bu xanımı tale Azərbaycan Dövlət Universitetinin (indiki BDU) kitabxanaçılıq fakültəsinin axşam şöbəsinə aparıb. Həyatda qarşısına çıxan çətinliklərdən zəkasının, iradəsinin, əməksevərliyinin sayəsində alnıaçıq, üzüağ çıxıb.
Həyat və fəaliyyətini Sumqayıtla bağlayan Gülnaz xanım uzun müddət şəhərimizin kitabxanalar sistemində çalışıb, oxucuların hörmətini qazanıb. Rəhbərlik etdiyi kitabxanalarda hər kəs ondan razılıq edib. Kitab təbliğatı və mədəni həyatımızla bağlı mətbuatda dərc olunan yazıları maraqla qarşılanıb. Təqaüdə çıxsa da yenə iş başındadır. Şəhərimizdə fəal ictimai iş aparır. Sumqayıt şəhər Veteranlar Təşkilatının sədr müavinidir. Burada da təşkilatçılığı ilə seçilir. 2025-ci il yanvarın 29-da keçirilmiş bələdiyyə seçkilərində məntəqə sədri olub.
Səmərəli fəaliyyəti heç zaman diqqətdən yayınmayıb. Sumqayıt şəhər İcra Hakimiyyətinin, Mədəniyyət Nazirliyinin və Regional idarənin, Veteranlar təşkilatının fəxri fərmanlarına, qiymətli hədiyyələrinə layiq görülüb. Bu səbəbdəndir ki, o, hamının sevimlisinə çevrilib.
Əlli illik əmək fəaliyyəti dövründə ictimai-mədəni həyatımızda fəal iştirak edib. Müxtəlif məzmunlu tədbirlərin təşkilinə nail olub. 2010-cu ildə Mədəniyyət Nazirliyinin, Azərbaycan Respublikasının Prezidentinin İşlər İdarəsinin "Prezident kitabxası”nın birgə layihəsi çərçivəsində nəşr olunan "Preziden İlham Əliyev və mədəniyyət” sərlövhəli iki cildlik kitabın tərtibatı və redaktəsi ona həvalə edilmişdir.
Onu da deyim ki, Gülnaz xanımın həyat yolu barədə mətbuatda və almanxlarda saysız yazılar işıq üzü görmüşdür. Bu gün də bu veteran xanımın haqqında xoş sözlər deyilir. O, iki oğul anasıdır, üç nəvənin nənəsidir. Həyat yoldaşını vaxtsız itirib. Söz düşəndə deyir ki, bütün həyatım, varlığım ailəmə bağlıdır. Övladlarımla, nəvələrimlə nəfəs alıram.
Gülnaz xanımı yubileyi münasibətilə təbrik edir, bu işgüzar xanıma can sağlığı, işlərində uğurlar arzulayıram.
İlhamə MƏHƏMMƏDQIZI
Xəbərdən istifadə edərkən istinad etmək vacibdir.
