Sumqayıt şəhərində yol hərəkəti qaydalarına riayət olunması ilə bağlı maarifləndirici kampaniyaya start verildi
Sumqayıt Şəhər İcra Hakimiyyəti və Sumqayıt Şəhər Polis İdarəsinin birgə təşkilatçılığı ilə şəhər ərazisində yol hərəkəti qaydalarının pozulmasının qarşısının alınması məqsədilə genişmiqyaslı maarifləndirici kampaniyaya start verilib. Aksiyanın əsas məqsədi piyadalar arasında yol hərəkəti təhlükəsizliyi ilə bağlı məlumatlılığı artırmaq və onların qanunvericiliklə müəyyən olunmuş qaydalara riayət etmələrini təşviq etməkdir. Prosesə şəhər üzrə fəal gənc könüllülər də cəlb olunub.
Bu məqsədlə Sumqayıt Şəhər İcra Hakimiyyətinin başçısı Zakir Fərəcov və Sumqayıt Şəhər Polis İdarəsinin rəisi, polis polkovniki Fəqan Azadəliyev gənc könüllülərlə görüş keçiriblər. Görüş zamanı şəhər rəhbərliyi tərəfindən Sumqayıtda həyata keçirilmiş infrastruktur layihələri və gələcəkdə planlaşdırılan təşəbbüslər barədə ətraflı məlumat verilib. Vurğulanıb ki, Sumqayıt şəhərində həyata keçirilən ictimai kampaniyalarda və sosial layihələrdə gənclərin fəal iştirakı daim diqqət mərkəzində olub.
Statistik təhlillərə əsasən, son dövrlərdə Sumqayıt şəhərində baş verən yol-nəqliyyat hadisələrinin əksəriyyəti piyadaların yol hərəkəti qaydalarını pozması – xüsusilə də yol keçidlərindən düzgün istifadə etməməsi ilə bağlıdır. Məhz bu səbəbdən də maarifləndirmə kampaniyasının əsas hədəfi piyadalar arasında davranış qaydalarının təbliği və yol hərəkəti mədəniyyətinin formalaşdırılmasıdır.
İlkin mərhələdə kampaniya maarifləndirici xarakter daşıyacaq, sakinlərə yol hərəkəti qaydaları izah ediləcək və düzgün keçid vərdişləri aşılanacaq. Növbəti mərhələdə isə qayda pozuntularına yol verən şəxslər barəsində müvafiq inzibati tədbirlərin görülməsi nəzərdə tutulur.
Bu təşəbbüs yol hərəkəti iştirakçıları arasında təhlükəsizliyin təmin olunması və vətəndaş məsuliyyətinin artırılması baxımından mühüm əhəmiyyət daşıyır.
Xəbərdən istifadə edərkən istinad etmək vacibdir.
