Bu gün cəmiyyətdə uşaqların davranışı,tərbiyəsi bir jurnalist kimi məni çox narahat edir. Peyğəmbərimiz(s)buyurub ki, uşaqlara tərbiyəni ana bətnindən başlayın. Amma çox təəssüf ki, indiki gənc ana və atalar uşaqların tərbiyəsinə vaxt ayırmaqdansa, başları başqa mövzulara qarışır. Ayılanda isə çox gec olur. Çox vaxt onlar düşünürlər ki,uşağa azadlıq vermək lazımdır. Razıyam azadlıq vermək lazımdır, amma yaş çərçivəsində...

Bəzən "əşii uşaqdır da böyüyəndə düzələcək"kimi fikirlərlə özlərini aldadırlar, təsəlli verirlər.Yalnış fikirdir. Evin gözəlliyi elə onun bünövrəsindən başlayır. Bünövrə əyri olarsa...evi də artıq təsəvvür edin də...

Əziz valideynlər, uşaqlarınızda heyvanlara qarşı mərhəmət, sevgi hissi oyadın. Bəzən küçələrdə qulağı,ayağı kəsilmiş, gözu çıxarılmış heyvanlara rast gəlirəm. Azyaşlı uşaqların heyvanlara qarşı qəddərcasına hərəkəti onların gələcəkdə qatilə çevriləcəyindən xəbər verir.Yadıma gəlir,uşaq vaxtı qonşumuzda bir oğlan var idi.Quşları tutub,başlarını üzmək onun hobbisi idi.Çox rahat şəkildə sərçələrin başını üzüb yerə atırdı.O, gedəndən sonra mən başları yığıb basdırırdım və neçə günlər özümə gələ bilmirdim.Çox çalışırdım ki, o oğlanda heyvanlara qarşı sevgi hissi oyadım.Amma alınmırdı,alınmıyacaqdı da... Çünki o öz ata-anasından peçenye,konfet, kukruz, hər şey almışdı. Sevgidən başqa...

İllər keçəndən sonra öyrəndim ki, həmin oğlan arzuolunmaz həyat sürür. Başa düşdüm ki,valideynlərin vaxtında tərbiyəsində buraxdığı səhvlər, artıq onun müqəddaratını həll etmişdi.....

Əvvəllər evin sonbeşiyini ərköyün böyüdərdilərsə, indiki ailələrdə uşaqların hamısı bu vəziyyətdə böyüyür.

Bu gün nəqliyyat vasitələrində tez-tez bir hadisənin şahidi oluram.Valideyni ilə altı-yeddi yaşlarında olan bir uşağın marşruta çıxması ilə salonda əyləşən yaşlı qocanın ayağa qaxması bir olur. Bu nə dərəcədə düzgündür axı? Hansı səbəbdən valideynlər yaşlılara qarşı bu cür hörmətsizliyə yol verirlər? Halbuki mən altı yaşında olanda anam məni qaldırardı ki, böyüklərə yer verim. Əziz valideynlər, indidən övladlarınıza böyüklərə hörmət etməyi öyrədin. Yoxsa özünüzü illər sonra qocalar evində görəcəksiniz...

Bizim uşaqlığımızla indiki uşaqlar arasında çox fərq var. Biz sözün əsl mənasında uşaqlıq yaşayırdıq.Düşüncələrimiz də, qəlbimiz də saf idi. Çünki bizim dövrümüzün uşaqları internetdən, əxlaqsızlığı təbliğ edən,cinayətə sövq edən oyunlardan istifadə etmirdi. Biz yeddi şüşə,gizlənqaç, ortada qaldı oyunları ilə böyüyən uşaqlarıq.Valideynlər azyaşlı uşaqlarını internetdən istifadə etmələrinə ötəri yanaşa bilərlər.Gələcəkdə problemlərlə üzləşəndə günahı övladlarında yox, özlərində görsünlər.Uşaqların beyni ağ kağız kimidir. Nə yazarsan onu da götürəcək.Çalışın ki,bu ağ səhifəyə gözəl fikirlər, əxlaq, tərbiyə, gözəl davranış,vətənə sevgi, nağıllar, bir sözlə, insani keyfiyyətlər yazın.Amma bu arada bir dahinin fikri yadıma düşdü.Uşaqlarınızı tərbiyə etməyə çalışmayın,onsuz da sizə oxşayacaqlar. Özünüzü tərbiyə edin....bəlkə elə özünüzdən başlayasınız?!

Zeynəb Abdullah