Milli mətbuatımızın yaranmasının 150 illik yubileyinə həsr olunmuş silsilə tədbirlərdən biri Sumqayıtın tarixi muzeyində baş tutub. Muzeyin rəhbəri Namiq Əliyev və Azərbaycan Yazıçılar Birliyi Sumqayıt bölməsinin sədri Gülnarə Cəmaləddinin təşəbbüsü və təşkilatçılığı ilə keçirilən görüşdə sumqayıtlı jurnalistlər, ziyalılar, muzeyin əməkdaşları iştirak edib. Iştirakçılar öncə bu münasibətlə təşkil olunmuş sərgi ilə tanış olublar. Sərgidə jurnalist, yazıçı-publisist Eyruz Məmmədovun, Azərbaycan Yazıçılar Birliyi Sumqayıt bölməsinin yardıcısı, mərhum şair Sabir Sarvanın şəxsi arxivindən olan materiallar, həmçinin Sumqayıt şəhərinin tarixini özündə əks etdirən şəhər qəzetlərindən nümunələr nümayiş olunub.

     Tədbirdə çıxış edən bölmə sədri, şair Gülnarə Cəmaləddin, muzeyin rəhbəri Namiq Əliyev və Sumqayıt şəhər İcra Hakimiyyətinin rəsmisi Fərman Kazımov Azərbaycan milli mətbuatının banisi Həsən bəy Zərdabinin 1875-ci ildə nəşr etdirdiyi ”Əkinçi” qəzetinin tarixi əhəmiyyətindən danışaraq bu qəzetin təkcə bir nəşr deyil, eyni zamanda maarifçilik hərəkatının əsas dayağı olduğunu qeyd ediblər.

     Son vaxtlarda jurnalistlərin sosial müdafiəsinin təmin olunması və peşəkarlığın artırılması istiqamətində mühüm işlərin görüldüyünü, müasir dövrün çağırışlarına cavab verən, qərəzsiz və milli maraqlara xidmət edən medianın önəmini vurğulayan natiqlər peşəkar, məsuliyyətli və prinsipial jurnalistikanın aktuallığını bir daha ön plana çəkərək yazılarda ana dilimizin qorunmasının vacibliyinə üstünlük veriblər.

      Qələm adamlarından professor Rafiq Yusifoğlu, AzərTAC-ın əməkdaşı Ətrabə Rzayeva, Əməkdar jurnalistlərdən Eyruz Məmmədov, Əli Nəcəfxanlı, "Sumqayıt” qəzetinin baş redaktoru Sübhan Quliyev, Hafiz Ataxanlı, Aydın Məlikov, Eyvaz Qocayev, Ramil Zeynallı, Namiq Məmmədli, Rəna İmanova, Sənurə Lazımova və başqaları çıxışlar zamanı mətbuatın inkişafı ilə bağlı fikirlərini bölüşüblər. Bildirilb ki, Azərbaycan mətbuatı xalqın səsi, dövlətin aynası olaraq öz şərəfli missiyasını davam etdirir. "Əkinçi”nin ruhu bu gün də peşəkar jurnalistlərin qəlbində yaşayır və yol göstərir. "Əkinçi” qəzetindən başlanan mətbuat yolumuz son 150 ildə mühüm mərhələlərdən keçərək bu gün müasir informasiya texnologiyaları ilə zəngin bir media məkanına çevrilib. Medianın cəmiyyətdəki əvəzsiz rolu xüsusi vurğulanıb, jurnalistlərin informasiya təhlükəsizliyi, ictimai rəyin düzgün formalaşması və şəffaflığın təmin olunmasında oynadığı rol yüksək qiymətləndirilib. Dövlətin mətbuatın inkişafına daim diqqət və qaygı ilə yanaşmasından bəhs edilib.

     Tədbirin təşkilatçıları sonda informasiya cəmiyyətimizin inkişafında fəallıq göstərən hər bir jurnalistə fədakar fəaliyyətinə görə xüsusi minnətdarlıqla uğurlar diləyiblər. Qələm adamlarına hədiyyələr təqdim edilib. Jurnalistlər göstərilən diqqətə görə təşəkkür edib və məmnunluq hissilə "Əkinçi”dən başlanan yolun davam etdiriləcəyini söyləyiblər. Sonda xatirə şəkilləri çəkilib.