"Bir çox ölkələrdə bu ənənə var. Bizdə isə nəticələri müsbət olmadı. Başlıca səbəblərdən biri də Azərbaycanın demoqrafiq, milli-etnik tərkibi ilə bağlı idi".
Bu fikirləri Milli Məclisin Təhlükəsizlik və Müdafiə Komitəsinin üzvü, millət vəkili Zahid Oruc Azərbaycanda ikili vətəndaşlığın hansı səbəbdən qadağan olunmasından danışarkən deyib. O qeyd edib ki, bir tərəfdən İrandan gələnlərin kütləvi olaraq vətəndaşlıq alması, yəni ikili fəaliyyət aparması bunun özünəməxsus iqtisadi-sosial çətinliklərini meydana çıxaracaqdı:
"Digər tərəfdən ermənilərin də ikili vətəndaşlıqla bağlı müraciət etmə imkanları olacaqdı. Bəlli idi ki, Qarabağdan kənarda da müxtəlif ermənilər yaşayır. Bunlar avtomatik olaraq özləri üçün başqa ölkələrin, eyni zamanda Ermənistanın da vətəndaşlığını arzulaya və bunu gerçəkləşdirə bilərdilər. Nə qədər kütləvi olacaqdı, bunu söyləmək çox çətndir. Ancaq bunu istisna edə bilmərik".
Z.Orucun sözlərinə görə, Rusiya ilə Azərbaycan arasında bu cür vətəndaşlıq məsələlərinə münasibətdə də kütləvi hallar meydana çıxa bilərdi:
"Məsələyə əsas siyasi tərəfdən daha çox iqtisadi-sosial aspektdə yanaşmaq lazımdır. Bu gün ölkədə müxtəlif müavinət, ödəniş, təqüdün formalaşması, sığorta sistemi və.s vətəndaşlıq amilinə bağlıdır. İnsanlar haradasa ikinci bir ölkədə işləyib, çalışıb Azərbaycan tərəfindən bu ödənişlərə layiq görülmək istəyəcəkdilər. Bir vətəndaşlıq halından fərqli bir vəziyyət Azərbaycan üçün müxtəlif öhdəliklər yaradacaqdı. Bu da dövlətin büdcə imkanları üçün əlavə vəsaitlər demək idi. Hesab edirəm ki, bütün bunları nəzərə alsaq Azərbaycanda ikili vətəndaşlıq amili qəbul olunmadı. Düşünürəm ki, bu doğru qərar idi". (olke.az)
Xəbərdən istifadə edərkən istinad etmək vacibdir.
