Sumqayıt sakinləri son günlər şəhərdə bəzi iaşə obyektlərində satılan ucuz kabab və dönərlərin keyfiyyəti ilə bağlı ciddi narahatlıqlarını bildirirlər.
Sakinlərin Xeberle.com-a bildirdiyinə görə, şəhərin bir sıra restoranlarında kababın bir payı cəmi 3 manata satılır. Halbuki, bazarda ətin bir kiloqramının qiyməti təxminən 20 manat civarındadır. Bu isə vətəndaşlarda haqlı suallar doğurur: "Bu qədər ucuz satılan kababın içində hansı ət istifadə olunur?”
Sakinlərin adını çəkdiyi obyektlər arasında əşya bazarının yaxınlığında yerləşən "Dürümcü Abi” və avtovağzalın yanında fəaliyyət göstərən "Dönəritto” kimi iaşə məkanları da var. Onların sözlərinə görə, bu obyektlərdə həm yeməklərin mənşəyi, həm də sanitar vəziyyət narahatlıq doğurur.
Şəhər sakinlərindən biri bildirir:
"Ət bu qədər bahadır, amma bəziləri 3 manata kabab satır. Biz artıq qorxuruq, bilmirik bu ət haradandır. İçəri baxanda da vəziyyət ürəkaçan deyil, işçilər əlcəksiz işləyir, təmizlik yoxdur.”
Qida təhlükəsizliyi sahəsinə cavabdeh qurumların bu kimi hallara qarşı nəzarət mexanizminin zəiflədiyi də iddia olunur. Sakinlər aidiyyəti qurumları – xüsusən Qida Təhlükəsizliyi Agentliyini (AQTA) və Sumqayıt şəhər icra hakimiyyətini məsələ ilə bağlı təcili addımlar atmağa çağırır.
Sumqayıtda bu cür ucuz kabab və dönər satan obyektlərin çoxalması həm ictimai sağlamlıq, həm də istehlakçı hüquqları baxımından təhlükəli tendensiyaya çevrilir.
Əgər bu vəziyyətə nəzarət gücləndirilməzsə, şəhərdə ciddi qida zəhərlənmələrinin və sanitar fəsadların baş verməsi istisna deyil.
Xeberle.com
Xəbərdən istifadə edərkən istinad etmək vacibdir.
