“Ziya Bünyodov prospektinin təmiri bu il başa çatacaq”. Bu barədə Modern.az-a açıqlama verən “Azəryolservis” ASC-nin rəhbəri, millət vəkili Cavid Qurbanov bildirdi ki, yol 10 zolaqlı olacaq. 

“Əvvəlcə 4 zolaqlı yolun tikintisi nəzərdə tutulurdu. Daha sonra bu yolların sayını 8-ə çatdırdıq. İndi isə 10 zolaqlı yol alınacaq”. 

Bakı-Sumqayıt yolunun genişləndirilməsi zamanı ağacların kəsilməsi ilə bağlı suala cavab verən millət vəkili bildirdi ki, onlar da ağac kəsilməsinin əleyhinədir. 

“Biz də ağacların kəsilməsinin tərəfdarı deyilik. Biz Ekologiya və Təbii Sərvətlər Nazirliyinə sənəd göndəririk ki, bu yolu genişləndirmək istəyirik. Ağacların pulunu ödəyirik, yeni pöhrələrin alınması üçün şərait yaradırıq. Deyirik ki, köçürmək mümkündürsə, köçürün, köçürmək mümkün deyilsə, yenisini alıb əkin. Sumqayıtla Bakı arasında gün ərzində 220 min maşın hərəkət edir. Sabah o yol bağlansa, necə olacaq? Həmin yolun sağ və sol tərəfini görmüsünüz. Orada hansı tərəfi sökək?..”.