Bakı-Sumqayıt dəmiryol xəttindəki yenidənqurma işləri ilə əlaqədar Sumqayıt sərnişin stansiyasında məskunlaşan 40-dan çox məcburi köçkün ailəsi stansiyadan köçürüləcək. Qaçqınların və Məcburi Köçkünlərin İşləri üzrə Dövlət Komitəsi tərəfindən həmin ailələrlə danışıqlar aparılıb və artıq razılıq əldə olunub.
Bu günlərdə Bakı-Sumqayıt dəmiryol xəttində yenidənqurma işləri daha da sürətləndirilib. Yeni qatarları qəbul etmək üçün dəmiryolu xətlərində təmir işləri artıq başa çatmaq üzrədir. Belə ki, 63 kilometrlik dəmiryolu xəttinin 53 kilometri tam hazırdır. Son tamamlama işləri isə Sumqayıt vağzalı ətrafında görülür.
Yeni gətirilən qatarların ölçüləri köhnə elektrik qatarlarından böyük olduğundan Bakı sərnişin stansiyası da bu qatarlara uyğunlaşdırılıb. Bakı sərnişin stansiyasında da təmir-tikinti işləri sürətlə davam etdirilir. Burda stansiya ölkəmizə yeni gətirilən iki mərtəbəli qatarların dizaynına uyğun tərtib edilib. Artıq yeni platformalar tikilib və dəmir yolu relsləri dəyişdirilib. İşlərin davamı olaraq rabitə siqnalizasiya sistemi də yenilənəcək. Burda bütün işlərin ən qısa zamanda başa çatdırılacağı gözlənilir. (xezerxeber.com)
Xəbərdən istifadə edərkən istinad etmək vacibdir.
