Müəllimin müasir dövrün irəli sürdüyü təlim-tərbiyə prinsiplərinin metodoji əsaslarına yiyələnməsi mühüm əhəmiyyət kəsb edir. Onun həmin əsaslara yiyələnməsi, yenilikləri öyrənməsi, bununla da pedaqoji prosesi dövrün tələbləri səviyyəsində təşkil etməsi yalnız özünün fəaliyyəti ilə bağlı olan bir məsələ deyildir. Bu iş elmi-pedaqoji dairlərdə sistemli şəkildə aparılmalı, fundamental elmi tədqiqat işlərinin nəticəsi kimi meydana çıxmalı, praktik müəllimlərin özlərinin bu işdə metodiki təcrübəsi nəzərə alınmalı, nəhayətdə müəllimin masası üzərinə dövrün təlim-tərbiyə prinsiplərini özündə cəmləşdirən vəsait gəlib çıxmalıdır. Bu baxımdan yeni nəşrlərin, metodik vəsaitlərin rolu danılmazdır. Məhz bu yöndə işıq üzü görən kitablardan biri kimi "Həmkara dəstək” metodik vəsaitini göstərmək olar. Kitabın təqdimat mərasimində edilən çıxışlar, deyilən fikirlər də bunu bir daha təsdiqləmiş oldu.

İyunun 19-da Bakı şəhər Səbail rayon 6 saylı məktəb-liseydə 230 saylı tam orta məktəbin direktoru Elşən Qafarov və həmin məktəbin direktor müavini Ləman Babayevanın birgə hazırladıqları "Həmkara dəstək” metodiki vəsaitinin təqdimat mərasimi keçirilib. Azərbaycan Təhsil Şurası tərəfindən təşkil olunan təqdimatı şuranın sədri, pedaqoji elmlər doktoru, professor Əjdər Ağayev aparıb. Təqdimat mərasimində Azərbaycan Təhsil Şurası idarə heyətinin üzvləri, Təhsil Nazirliyinin əməkdaşları, Bakı Şəhəri Üzrə Təhsil İdarəsinin əməkdaşları, təhsil sahəsi üzrə ekspertlər (Şahlar Əsgərov, Etibar Əliyev və sair), məktəb direktorları, müəllimlər, media mənsubları iştirak edib. Azərbaycanın dövlət himni səsləndikdən sonra Şuranın sədri, pedaqoji elmlər doktoru, professor Əjdər Ağayev tədbiri açıq elan edib. Sonra çıxış edərək təhsildə aparılan islahatlara və yenilliklərə diqqət çəkib. Bakı-2015 ilk Avropa Oyunlarında medallar qazanmış idmançılarımızı təbrik edib. İdmanda əldə edilən nailiyyətlərdə Prezident İlham Əliyevin idmançılara göstərdiyi diqqət və qayğıdan söz açıb. "Həmkara dəstək” vəsaitinin müəllimlərinin peşəkarlığının artmasında müstəsna rol oynadığını qeyd edib. Ə.Ağayev bəzi mətbuat orqanlarında təhsillə bağlı xoşa gəlməyən yazıların yazılmasına münasibət bildirib. O, 230 saylı məktəbin kollektivinin təşəbbüsünü ictmai təşəbbüs kimi qiymətləndirib. Bildirib ki, belə təşəbbüslərə Təhsil Şürasının elmi metodiki mərkəzinin qapıları açıqdır: "İstənilən yaradıcı kollektiv bizə müraciət edə bilərlər".
Tədbirdə çıxış edən təhsil işciləri "Həmkara dəstək” metodiki vəsaitinin müəllimlərin stolüstü kitabı kimi əhəmiyyətli tərəfindən söz açıblar. Kitabın tərtibçilərinə uğurlar arzulayıblar. Sonda bu layihənin tərtibçisi Elşən Qafarov çıxış edərək tədbirdə iştirak edənlərə təşəkkürünü bildirib. O söyləyib ki, müəllim həmkarlarının bu sahədə ehtiyacını nəzərə alaraq belə bir vəsaitin hazırlanmasını vacib bilib. "Həmkara dəstək" vəsaitinin müəllimlərin sınaq qiymətləndirmələrində, müəllimlərin qəbul imtahanında, yeni təlim metodlarındakı rolundan bəhs edib. Həmkarlarını yaradıcı fəaliyyətə - analoji nəşrlərə səsləyib. Direktor həmkarlarına məktəbdaxili təlimlər keçirməyi tövsiyə edib.

Qeyd edək ki, kitab müəllimlər üçün praktik əhəmiyətliliyi ilə yanaşı, elmi dəyəri ilə də diqqəti cəlb edir. Tərtibçilər vəsaitdə kurikulum anlayışını, kurikulum islahatını zəruri edən səbəbləri, təhsil islahatlarının mərhələlərini, təhsil islahatları ilə bağlı dövlət sənədlərini, fənn kurikulumlarının səciyyəvi cəhətlərini, kurikulum və ənənəvi tədris proqramı, məzmun standartlarının quruluşu və müəllimlərə gərəkli olan digər mühüm məsələləri şərh etməklə, əslində həm elmi, həm də təcrübi mahiyyətli bir iş meydana gətirə bilmişlər. Fəal təlimin formaları, üsulları, üstünlükləri, onun əsas mexanizmləri barəsində irəli sürülən fikirlər, göstərilən metodiki qaydalar, eləcə də fəal təlimin ənənəvi təlimlə müqayisəli təqdimatı vəsaitin praktik mahiyyətini artırır. Bu həm də onu deməyə əsas verir ki, tərtibçilər vəsaiti hazırlayarkən ənənəvi təlimin mahiyyətindən yan keçməmiş, onun müasir bazanın yaranmasındakı rolunu nəzərə almışlar.

Təhsil qanunvericiliyinin tələblərini özündə ehtiva edən "Həmkara dəstək” kitabı çox faydalı vəsait kimi pedaqoqların ixtiyarına verilib. 200 səhifəlik vəsaitdə 750 test sualı cavabları ilə birlikdə, kurikulum nəzəriyyəsinin sadələşmiş şəkildə izahı, tezarus və digər məsələlərlə bağlı materiallar öz əksini tapıb. Kitabın çap olunmasının əsasında müəllimlərin əksəriyyətinin kurikulumla bağlı biliklərinin eyni səviyyədə olmaması zərurəti durur.

Kitab artıq region məktəblərindəki müəllimlər arasında da yayılmaq üzrədir. Sosail şəbəkədə keçirilən sorğu əsasında pedaqoqların böyük əksəriyyəti bu vəsaitin hazırlanmasını qrupda paylaşılan kurikulum təhsil materialların bir kitabda cəmlənməsini dəstəklədilər. Şübhəsizdir ki, hər bir müəllimin stolüstü kitabına ceviriləcək vəsait region müəllimlərinin sınaq qiymətləndirilməsi səviyyəsinin yüksəldilməsinə xidmət edəcək, dünyanın mütərəqqi təhsil modellərindən biri olan kurikulumun geniş şəkildə öyrənilməsi sahəsəndə müəllimlərimizə dəstək olacaq. "Həmkara dəstək” metodik vəsaitinin bir üstünlüyü də sadə dildə yazılaraq müəllimlərin aydın başa düşəcəkləri bir formada hazırlanmasıdır.

Vəsait Təhsil Şurası İdarə Heyətinin və Şuranın Elmi-Metodiki Mərkəzinin qərarı ilə çap olunub. Onun hazırlanmasında pedaqoji elmlər doktoru, professor Əjdər Ağayevin, psixologiya elmləri doktoru Əbdül Əlizadənin, pedaqogika üzrə fəlsəfə doktoru Ənvər Abbasovun və digər müəlliflərin müxtəlif illərdə yazdıqları əsərlərdən, elmi-tədqiqat işlərinin nəticələrindən yaradıcılıqla istifadə olunmuşdur. Bu da öz növbəsində vəsaitin həm elmi, həm də praktik mahiyyətini artırır. Qeyd edək ki, kitabın rus dilində olan variantı da oxucuların istifadəsinə verilmişdir.
Elnur Ağayev
Xeberle.com

Xəbərdən istifadə edərkən istinad etmək vacibdir.