Birinci Avropa Oyunlarının 12-ci günüdür. Bu günə qədər Rusiya 87 medalla birinci, Azərbaycan 39 medalla ikinci, Almaniya isə 32 medalla üçüncüdür.

"Salamnevs” saytının əməkdaşı Orxan Kərimov:

"Avropa Oyunları Azərbaycanın tarixində yeganə hadisədir ki, mindən çox jurnalist rəsmi qeydiyyatdan keçib. Təbii ki, hamının yadında qalan əsas hadisə heç kimin bu dərəcədə gözləmədiyi möhtəşəm açılış mərasimi oldu. 

Oyunlarda isə mənim üçün yadda qalan hadisələrdən biri güləşçi Rəsul Gunayev  rəqibi üzərində qələbə çalandan sonra adəti üzrə bu dəfə də üzünü tribunada əyləşən ölkə başçısı İlham Əliyevə tutaraq ona doğru əsgəri yerişlə addımlayıb, hərbi salam verməsi oldu.

Prezident İlham Əliyev Avropa Oyunları ilə bağlı çıxışlarının birində qeyd edib ki, Azərbaycan bununla fəxr edir və hər birimiz həyatımızın yadda qalan günlərindən həzz alırıq”.

Azpress.az saytının idman əməkdaşı Təranə Xudabaxşiyeva:

"Oyunlar zamanı ən yadda qalan hadisələrdən biri "Baku Crystal Hall”da baş verib. Boks yarışını izləməyə getmişdim. Həmin gün ziyafət veriləcəyinə görə hündürdaban ayaqqabı geyinmişdim. Türkiyə boksçusunu gözləyərkən dayandığım yerdə sanki kimsə məni itələdi. Yıxıldığımı görən mühafizə əməkdaşları gülmək istəyir, amma utanırdılar. Üzümü onlara tutub dedim ki, gülmək istəyirsinizsə, gülün. Hətta özüm də güldüm. Elə oradaca ayaqqabılarımı çıxarıb bütün günü ayaqyalın gəzdim. Çox insan təəccüblənsə də, kompleksizliyimdən rahat gəzə bildim”.

Gün.az saytının əməkdaşı Fərid Ədalət:

"Avropa Oyunlarında unudulmayacaq bir çox hadisə yaşanır. Oyunlar məhz ilk dəfə keçirildiyi üçün "Bakı-2015” özü unudulmayacaq. Ən yadda qalan hadisə açılış mərasimi oldu. Azərbaycan bir gecədə mədəniyyətini, incəsənətini, tarixini, ədəbiyyatını, qonaqpərvərliyini və mükəmməl təşkilatçılığını nümayiş etdirdi. Açılışın möhtəşəm olması növbəti günlərdə oyunlara gedən azarkeşlərin sayının artmasına da səbəb oldu. Daha bir maraqlı məqam, türkiyəli idmançılara bütün arenalarda azarkeşlərin dəstəyi ilə bağlıdır. Bu dəstək "Bir millət, iki dövlət” ifadəsini sözün əsl mənasında doğrultdu. Digər maraqlı məqam gimnastika yarışlarında polşalı idmançının batut üzərindən yıxılarkən azərbaycanlı könüllünün onu tutması və ciddi zədələnməsinin qarşısını alması oldu. Bu o deməkdir ki, könüllülər həqiqətən də Birinci Avropa Oyunlarında tam istəklə iştirak edirlər”.

"Yeni Müsavat” qəzetinin əməkdaşı Məhəmməd Türkmən:

"Özümlə bağlı yadda qalan, hətta heç unutmayacağım hadisə "Baku Crystal Hall”a ilk getdiyim gün çiynimdə kamera dolu çanta ilə bütün zalı gəzməyim oldu. Yarış zalını tapa bilmirdim. Könüllülər də mənim kimi bilmədikləri üçün biri sağa, biri sola göndərirdi. O gün yaman hirslənmişdim.

Oyunlarla bağlı isə dünənki hadisəni yəqin ki, unutmaram. Samboçumuz döyüş zamanı zədələndi və axsamağa başladı. Belarusdan olan rəqib idmançımızı çiyninə qaldırıb həkimlərin yanına kimi apardı. Bu jesti unutmaram.

Ümumiyyətlə, mən bu oyunlarda idmançılardan əsl professionallıq görürəm”.  (Modern.az)