Bu gün  Fövqəladə Hallar Nazirliyinin (FHN) Sumqayıt Regional Fövqəladə Hallar və Mülki Müdafiə şöbəsinin cari ilin illik tədbirlər planına əsasən  Oğuz-Qəbələ-Bakı Su Kəməri idarəsində "Obyekt Mülki Müdafiə məşqi" keçirib.  Məşqdə “Azərsu”  QSC-nin Xüsusi şöbəsinin rəisi, Mülki Müdafiə Qərargahının rəisi, Sumqayıt Regional Fövqəladə Hallar və Mülki Müdafiə şöbəsinin rəisi, polkovnik Altay Şikarov və şəxsi heyət, Abşeron rayon yanğınsöndürmə xidmətinin bir maşını və şəxsi heyəti, Abşeron rayonunun Mərkəzi xəstəxanasının Təcili tibbi yardım stansiyasının bir maşını və işçiləri, o cümlədən Qızıl Aypara Cəmiyyəti (QAC) Sumqayıt şəhər bölməsinin sədri Mətanət Məhərrəmova və bölmənin xüsusi geyimli mobil dəstə üzvləri  iştirak ediblər.

Bölmənin təlimatçısı Günel Məmmədovanın  xeberle.com-a verdiyi məlumata görə Oğuz-Qəbələ Su Kəməri idarəsinin ərazisində Qızıl Aypara Cəmiyyəti Sumqayıt şəhər bölməsinin mobil dəstə üzvləri tərəfindən  çadır qurulub və bölməyə məxsus texniki avadanlıqlar yerləşdirilib. Məşqdə şərti olaraq zəlzələ zamanı baş verən hadisə nəzərdə tutulub, Oğuz-Qəbələ Su kəməri ərazisində süni yanğın törədilib, əraziyə yanğınsöndürən maşınlar və kəşfiyyat qrupu daxil olub. QAC Sumqayıt şəhər bölməsinin Mobil dəstə üzvləri xəsarət almış insanların zonadan çıxarılması və onlara ilk yardım göstərmək üçün çadırlara çatdırılmasında fəal iştirak ediblər. Yaralılar mobil dəstə üzvləri tərəfindən təhlükəli ərazidən uzaqlaşdırıb və onlara ayparaçı tibb bacıları tərəfindən ilk yardım göstərilib. Zərərçəkmişlərə ilk yardım göstərildikdən sonra onlar xəstəxanaya çatdırılıb. Məşqin sonunda rəhbərlik tərəfindən sıra baxışı keçirilib, məşqin qənaətbəxş olduğu qeyd edilib və iştirakcılara minnətdarlıq ifadə olunub.