Ölkə mətbuatının inkişafında vacib məqamlardan biri regional mətbuatın mövcudluğu, onun inkişafıdır. Təəssüf ki, Azərbaycanda bu sahədə ciddi uğurlar hələ də yoxdur. Yerli, regional mətbuat cəhətdən axsayır milli mətbuatımız. Bütün media orqanları və media-holdinqlər paytaxtda cəmləşib. Regional medianın inkişafı milli mətbuatın inkişafının əsas stimullaşdırıcılarındandır. Yaşadığımız Sumqayıt şəhərində isə bu sahədə nisbətən normal durum var, 168 saat regioanl nəşr kimi 2005-ci ildən Sumqayıtda fəaliyyət göstərir. Əsasən regional portal kimi fəaliyyət göstərən "Xəbərlə” isə (Xeberle.com) 2012-ci ilin iyun ayından Sumqayıtda Elnur Ağayev, Ramil Zeynallı və Kamal Almuradlı tərəfindən təsis edilib. Bu portal Xəbərlə MMC-nin balansındadır.

Sevindirici haldır ki, hazırda xeberle.com saytlar içində ən çox oxucusu olan regional portaldır. Portalın əsas məqsədi, əsasən, Sumqayıt şəhərinin ictimai-siyasi, sosial-mədəni həyatında baş verən olayları: yenilik, dəyişiklik və problemləri ictimaiyyətin diqqətinə çatdırmaq, şəhərin tarixi şəxsləri, istedadlı, uğur qazanan gəncləri haqda məlumatlar verməkdir. Eyni zamanda, portal ümumən ölkədə və dünyada baş verən ən mühüm xəbərləri də təqdim etməyi əsas vəzifələrindən hesab edir. Portal ilk öncə xəbəri dolğun və tərəfsiz çatdırmağı qarşısına məqsəd qoyub. Belə ki, portalın əsas məqsədlərindən də biri Sumqayıtla bağlı dolğun, ən son, eksklüziv xəbərlərin əsas yayıcısına çevrilməkdir.

Eyni zamanda, Xəbərlə MMC-nin nəzdində 3 ay əvvəl Sumqayıtda ilk olaraq internet TV təsis edilib – www.sumqayit.tv. Bu TV hələlik gündəlik xəbər yayımı ilə məşğul olmur. Tamaşaçılara müxtəlif reportajlar, araşdırmalar, müsahibələr, sosioloji rəy sorğuları, siyasətdən şou-biznesə, idmandan texnologiyalara qədər geniş bucaqda verilişlər, materiallar təqdim edir. Artıq TV-nin opreator, montajçı və müxbir heyəti var. TV təsisçiləri olaraq gələcəkdə mövzu və yayım imkanlarını genişləndirmək istiqamətində tədbirlər düşünürük.
Sumqayıt.tv yaranmasında Xeberle.com-a borcludur.
Çox istərdik ki, hər bir şəhər və rayonumuzun yerli media orqanları olsun. Bu, ilk növbədə XXI əsrdə orada yaşayan hər bir sakinin şəhərində, rayonunda hansı hadisələrin baş verməsindən xəbərdar olması, yeri gəldikdə oradan öz fikrini bildirməsi, problem və şikayətlərinin çatdırılması üçün azad bir tribuna deməkdir.

Hədəflərimiz və ideyalarımız çoxdur. Allahın və siz oxucuların sayəsində daha böyük uğurlara imza atmağa iddialıyıq.

3 yaşın mübarək, doğma Xeberle.com!!!
Redaksiyadan
P.S. Bu fotolarla sizə Xəbərlə-nin fəaliyyət sferasının bu 3 ildə miqyas və nəbzini cüzi də olsa, tutmağa yardım etmək istədik...