"Diqqətimi çəkməyə bilməzdi, axı mənim Sumqayıtımı əks etdirirdi"

Məni Sumqayıt şəhəri ilə bağlayan bir çox dəyərlər vardır. Doğulub boya-başa çatdığım, gənclik illərimi xərclədiyim bu şəhər mənim üçün həqiqətən də əzizdir. Əvvəllər bəlkə də buna əhəmiyyət vermirdim, lakin sonralar daha tanındıqca hiss etdim ki, bu şəhər onun adını ucaldan istedadlara və ya artıq şəhərdənkənar iri miqyasda tanınmışlara olduqca biganədir. Baxmayaraq ki, bu istiqamətdə fəaliyyət göstərən şəhər dövlət qurumları, özünün kütləvi informasiya vasitələri və hətta televiziyası var (bu televiziyanın indiyədək hansı vəzifələri olduğunu, nə üçün fəaliyyət göstərdiyini hələ də anlamış deyiləm). Yeni istedadlara dəstək olmaq, Sumqayıtdan çıxmış tanınmışlarla Sumqayıt sakinlərini görüşdürmək nə qədər motivasiyaedici, qürurverici bir amil ola bilər, bunu hər kəs gözəl dərk edir. Lakin...

Lakin, düz 3 il bundan öncə Sumqayıtda bir sayt yarandı. Bir sayt yarandı ki, yarandığı gündən maraqlılığı ilə diqqətimi çəkdi: Sumqayıta həsr olunmuş məqalələr, süjetlər, sumqayıtlı tanınmışlar və s. barədə məlumatları yayırdı. Diqqətimi çəkməyə bilməzdi, axı mənim Sumqayıtımı əks etdirirdi... Onun hər bir xəbəri, şəhərimdə baş verən yeniliklərə necə biganə qala bilərəm axı?! Qürurlandım, sevindim... Amma eyni zamanda düşündüm: bu da mı Sumqayıt televiziyasının gününə düşəcək?! Çox çəkmədi ki, redaksiyadan gələn bir zəng və dialoq bütün bu şübhələrimi darmadağın etdi. Redaksiyanın baş redaktorunun həvəsi, savadı, entuziazmı, mənə nümayiş etdirdiyi nəvazişi və qayğısı, bunun sumqayıtlılar üçün nə qədər önəmli olması və s. kimi nüansları vurğulamasından sonra saytın gələcəyinə, bu günə kimi mövcud olan şəhər biganəliyini kompensasiya edə biləcəyinə inandım. İnandım və budur, artıq bu saytın 3 yaşı tamam olur. Düz 3 ildir ki, bütün çətinliklərə baxmayaraq maddi və mənəvi əziyyətlərə sinə gərərək irəli addımlayan Xeberle.com saytının növbəti ad günündür!

Dəyərli, Xeberle.com redaksiyasının kollektivi, Sizi 3 yaşınız münasibətilə təbrik edirəm! Bir sumqayıtlı olaraq hər zaman Sizin fəaliyyətinizə dəyər verir, daimi inkişafınızı arzulayıram!

Ruslan Sabirli,
kinoaktyor, rejissor, bəstəkar