İnsan ətrafı anlamağa başladığı vaxtlardan müxtəlif xəyallar qurur. Böyüyüb yaşa dolduqca müəyyən şəxsləri özünə örnək görür, daxilində o şəxslərə qarşı rəğbət yaranır. Daha sonra bu şəxsləri özlərinə ideal seçdikləri üçün ürəklərində onların peşələrinə sevgi yaranır.

Müharibənin ağır illərinin əziyyətini çəkmiş bir ailədə dünyaya gəlmək özü isə bu seçimləri etməkdə daha böyük rol oynayır. Sizcə, "Ermənistanın silahlı qüvvələri yenidən atəşkəsi pozmağa cəhd etmişdir" xəbərləri ilə böyüyən körpə bir qızın ən böyük arzusu nə ola bilərdi?! Əlbəttə ki, böyüyüb jurnalist olmaq. Bu sözləri səsləndirən jurnalistlərdən birini özünə ideal seçmişdi o qız. Azyaşlı bu qızın düşüncəsinə görə hər bir məlumatı ilk əldə edən o jurnalistlərdir və sanki o da jurnalist olmuş olsaydı, evdə səbirsiz, çarəsiz bir şəkildə gözləmək yerinə, hər an cəbhədə olacaq, özü şahidi olduğu məlumatları xalqına ötürəcək, ölkəsinə, Vətəninə cəbhədə dəstək olacaqdı. Kim bilir?! Bəlkə də 10-11yaşlarında həyatını öyrəndiyi şəhid jurnalist Salatın Əsgərova kimi o da bu yolda şəhid olacaqdı. Bax bu misralarda olduğu kimi yarandı jurnalistikaya olan böyük sevgim. Bu misralarda bəhs etdiyim qız mən idim. Bu gün illər ötüb o müharibə illərindən. Çox şey dəyişib. Ölkəmiz xeyli inkişaf edib amma mənim jurnalist olmaq arzum heç də başqa bir istəklə əvəz olunmayıb.
Bu arzumu mən tez-tez xatırladan xəbər portalları var ki, Xeberle.com da o portallardan biridir. Jurnalist adına xələl gətirməyən, xalqımız, dövlətçiliyimiz adına daim çalışan o möhtəşəm komanda jurnalist olmaq arzumu fəxrlə səsləndirməyimə səbəbkar olanlardandır. Tam səmimi fikirlərimi ifadə edərkən mütləq qeyd etməliyəm ki, tanıdığım operativ xəbər portalları içərisində birincidir. Jurnalist harayçıdır. Qələbə və ya məğlubiyyət harayı fərq etməz. Bunların hər ikisində xalqın yanında olandır jurnalist. Millətin pis və yaxşı hər bir anını paylaşan şəxslərdir jurnalistlər. Necə deyərlər?! Kədərinə və sevincinə şərik olan kəslər. Bu sahədə qorunması gərəkən ən vacib şey vicdandır, məncə. Dəqiq, qərəzsiz və vicdanlı olmaq isə "hər" kişinin deyil, "nər" kişinin işidir.
Fürsətdən istifadə edib bu gün ölkəmizin ev sahibliyi etdiyi mötəbər bir yarışın hər bir təfərrüatını saytında və sosial şəbəkələrdə anında bizimlə paylaşan "Xeberle" portalına təşəkkür edirəm.

Hazırda jurnalist olmasam belə, torpaqlarımızın 20 faizi işğal altında olmuş olsa belə, "Bayramın mübarək, Azərbaycan! Qarabağ işğaldan azad oldu!" kəlmələrini efirdən xalqıma səsləndirəcək şəxslərdən biri olacam. Bəlkə bunları ilk yayımlayan internet kanalı Sumqayit.tv, ilk yazan xəbər portalı xeberle.com olacaq?!

100 yaşında da belə dəqiq, qərəzsiz və vicdanlı qal, Xeberle.com! Ad günün mübarək!

Arzu Nəbizadə
Sumqayıt Dövlət Universitetinin Ritorika Universal Klubunun sədri