Zaur Həsənov ötən il dekabrın 25-də Bakıda, Həmkarlar İttifaqları Konfederasiyasının binası önündə üstünə benzin tökərək özünü yandırıb. O, 1995-ci ildən bəri paytaxtın Bibiheybət qəsəbəsində işlətdiyi kafenin Həmkarlar İttifaqları Konfederasiyasının iddiası ilə sökülməsinə etiraz edib. Məsələ böyük rezonans doğurduğundan ölkə prezidenti işə qarışıb və dekabrın 27-də Azərbaycan Həmkarlar İttifaqları Konfederasiyası Zaur Həsənovun ailəsinə ayda 1500 manat yardım vermək qərarı çıxarıb. Sökülmüş obyektinə görə isə Zaur Həsənova 100 min manat ödənilib. Zaur Həsənov dekabrın 28-də xəstəxanada dünyasını dəyişib.

Yanvarın 7-də  açıqlamasında Həsən Həsənov deyib: “Oğlumun intiharı ilə bağlı hüquq mühafizə orqanlarının apardığı araşdırmadan hər hansı yeni xəbər yoxdur. Hadisə ilə bağlı ölkə prezidentinə müraciət edilmişdi. Qərar verilmişdi ki, cinayət işi açılsın, amma hələ heç bir addım atılmayıb. Təbii ki, şikayət edəcəm. Tapsınlar görək bu işin səbəbkarı kimdir? Şəhərin mərkəzində – Həmkarlar İttifaqları Konfederasiyasının, Konstitusiya Məhkəməsinin yerləşdiyi binanın önündə görmədilər ki, o boyda adam özünü yandırır? Bir nəfər onun qarşısını ala bilməyib”.

Dekabrın 29-da Bakının Fəvvarələr meydanında Zaur Həsənovun ölümü ilə əlaqədar bir qrup gənc aksiya keçirib. Bu aksiyaya görə 6 nəfərə inzibati həbs cəzası verilib, 16 nəfər isə cərimələnib.

Həsən Həsənov “Media forum”a bildirib ki, bu aksiyadan xəbəri olmayıb: “Oğlumu intihar həddinə çatdıranlara etiraz olaraq gənclərin aksiya keçirməsindən xəbərim olmayıb. Əgər onlar həbs olunublarsa və onlara qarşı təzyiqlər varsa, mən müraciət edərəm ki, onları buraxsınlar. Çünki onlar haqq sözlərini deyiblər. Haqq sözünü dedikləri üçün insanı həbs edərlər?!”

Zaur Həsənovun iki qardaşı həbsdədir. Onlardan biri – Anar Həsənov 12 il həbs cəzası alıb, 8 il yarımdır cəza çəkir. Həsən Həsənov deyib ki, həbsdə olan övladlarından Anarın Zaurun yas mərasimində iştirak etməsinə icazə verilməsi, ümumiyyətlə əfv olunması üçün müraciət edəcək: “Anar 11 saylı Cəzaçəkmə Müəssisəsində saxlanır. O, əfv ərizəsi yazıb, ərizə lazımi instansiyalara təqdim ediləcək”.