Sumqayıt Dövlət Universitetində (SDU) "Məzun günü” keçirilib. Tədbirdə ali məktəbin rektoru, universitetin professor-müəllim heyəti və tələbələr iştirak ediblər.

SDU-nun mətbuat xidmətindən Reader.az-a bildirilib ki, əvvəlcə tədbir iştirakçıları universitetin foyesində ümummilli lider Heydər Əliyevin büstü önünə tər güllər düzüb, dahi şəxsiyyətə hörmət və ehtiramlarını bildirdilər.

Bayram tədbirində universitetin rektoru, professor Elxan Hüseynov bildirdi ki, Sumqayıt Dövlət Universiteti bu gün Azərbaycanın qabaqcıl ali təhsil ocaqları sırasında layiqli yer tutur və ölkəmiz üçün savadlı mütəxəssislər yetişdirir. Ali təhsil müəssisəsinin tarixi, fəaliyyəti haqqında məlumat verən rektor vurğuladı ki, universitet 1960-1961-ci illərdə Azərbaycan Neft və Kimya İnstitutunun yaratdığı tədris məntəqəsi kimi fəaliyyətə başlasa da, 1962-1975-ci illərdə Azərbaycan Neft və Kimya İnstitutunun filialı, 1975-1992-ci illərdə Ali Texniki Təhsil Məktəbi, 1992-2000-ci illərdə isə Azərbaycan Sənaye İnstitutu kimi fəaliyyət göstərib. Ulu Öndər Sumqayıt şəhərində yaşayan gənclərin ali təhsilinin inkişaf etdirilməsi, milli ideologiyamızın formalaşdırılması, müstəqil dövlətimizin möhkəmləndirilməsi naminə 2000-ci il iyunun 13-də ali məktəbin Sumqayıt Dövlət Universiteti kimi fəaliyyət göstərməsinə qərar verib. Həmin tarixi gündən 15 il ötür.

Rektor Elxan Hüseynov diqqətə çatdırdı ki, müasir Azərbaycan elmi və təhsili beynəlxalq təcrübəyə əsaslanaraq sürətlə inkişaf edir. Bu baxımdan qarşıya qoyulan hədəflərdən biri də təhsilimizin Avropa təhsil standartlarına inteqrasiyasıdır. Bu məqsədlə universitetdə təhsil alan tələbələrin yüksək səviyyəli kadr kimi yetişməsi üçün hərtərəfli şərait yaradılıb.

Universitetin fəlsəfə və hüquq kafedrasının müdiri, professor Həsən Sadıqov ali məktəbin kollektivini və valideynləri təbrik etdi, gənclərə gələcək ali təhsildə və karyera fəaliyyətlərində uğurlar dilədi.

SDU-nun keçmiş məzunu, "Azərişıq” Açıq Səhmdar Cəmiyyətinin Sumqayıt Regional Enerji Təchizatı və Satışı İdarəsinin rəisi Ramil Yusifov, valideynlər adından Azad Qədirli və başqaları çıxış edərək məzunları təbrik etdilər, onlara həyatlarının bundan sonrakı illərində də uğurlar arzuladılar.

Tədbirdə, həmçinin bu il universiteti əla qiymətlərlə bitirən və ictimai həyatda fərqlənən məzunlara diplomlar təqdim olundu.

Tədbir bayram konserti ilə davam etdirildi.  (reader.az)