Azərbaycan Respublikası Təhsil Problemləri İnstitutunun təşkilatçılığı və Danimarkanın Kopenhagen şəhərində yerləşən ESSE İnstitutu təlimçilərinin iştirakı ilə Bakıda dörd günlük seminar keçirilib. Azərbaycan Dillər Universitetinin akt zalında təşkil olunmuş "Pedaqoji kadrların peşəkarlığının yüksəldilməsi: mənəvi dəyərlərə əsaslanan təhsil" mövzusundakı seminarda paytaxtdan və bölgələrdən müəllimlər, təhsil işçiləri iştirak ediblər.

Lakin maraqlı olan budur ki, treninq mühazirəçiləri ESSE İnstitunun nəzdində fəaliyyət göstərən buddist, məşhur hindistanlı yoqa və özünü "canlı Tanrı” adlandıran Satya Sai Babanın dini təlimlərinin ardıcılları olub.  

Müqəddəs Ramazan ayında, milli-mənəvi dəyərlərə, mütəxəssislərə sahib Azərbaycanda, respublikanın öncül müəllimləri üçün xaricdən hansısa radikal və islama yad bir sekta nümayəndələrinin gələrək treninq keçməsi müəyyən müəmmalar və suallar yaradır. 

Sözügedən treninqdə baş verənlər haqqında İnterAz-a orada iştirak edən müəllimlər məlumat veriblər. Hətta treninqdə baş verənlər əksər müəllimlərin narazılığına səbəb olub. Müəllimlər İnterAz-a açıqlaması zamanı bildiriblər ki, Azərbaycanda kifayət qədər öz milli kimliyinə və dini dəyərlərinə bağlı mütəxəssislər və akademiklər olduğu halda buddist bir cərəyan nümayəndələri nəyə görə ölkəyə dəvət olunaraq respublikanın ən öncül müəllimlərinə təlimkeçməlidirlər!? 

Digər bir nüans bundan ibarətdir ki, treninqlə bağlı bir ay öncədən respublika üzrə məlumat yayılsa da  kimlərin təlim keçəcəyi barədə məlumat verilməyib. 

Təlimlərə girişin qiyməti isə 100 manat olub. Bir günlük təlimdə iştirak üçün isə 330 müəllim iştirak edib ki, bu da ümumilikdə 30 min manatda çox pul edir. 

Onu da xatırladaq ki, sözügedən sekta 90-cı illərin əvvəllərindən etibarən Azərbaycan fəaliyyəti qadağan edilib. Hazırda təhsil müəssisələrində, xüsusilə məktəblərə verilən internetlərdə sözügedən sekta ilə bağlı məlumatlara giriş qadağan olunub.  

Qeyd edək ki, treninqi həyata keçirən ESSE institutu  ("European Sathya Sai Education Institute”),  1926-ci ildə Hindistanda dünyaya gələn və 2011-ci ildə dünyasını dəyişən və özünü tanrı adlandıran, ardıcılları tərəfindən canlı ilah və avatara kimi qəbul edilən hindistanlı Satya Sai Baba adını daşıyır. 

Adı sanskrit dilində "həqiqi ana və ata" mənasını ifadə edən Satya Sai Baba xatirələrində 14 yaşında komaya düşdüyünü, iki ay güclü ağrılar keçirdiyini, tez-tez huşunu itirdiyini və bu hadisələrdən sonra parapsixoloji qabiliyyətlərinin genişlənərək, inkişaf etdiyini söyləmişdir.  

Satya Sai Baba özünü "canlı Tanrı" adlandırdıqdan sonra ailəsini və yaxınlarını tərk etmiş, ardıcıllarının köməyi ilə Puqqaparti kəndində "Daimi sükut iqamətgahı" ("Praşanti Nilayam"), sonradan isə "Satya Sai Baba Foundation" adlı beynəlxalq təşkilatlar yaratmışdır. 

Satya Sai Baba Puqqaparti şəhərində tərəfdarlarının vəsaiti hesabına monastır kompleksi inşa etdirmişdir ki, monastırın tavanı qızılla örtülmüşdür.

Sai Baba tərəfdarlarını inandırmağa çalışırdı ki, o, yalnız yuxa, düyü və isti su ilə qidalanır. Həqiqətdə isə onun təkcə şam yeməyinə 6-8 növ yemək daxildir. Son illərdə "Allaha sadiq insan" kimi tanınan Sai Babanın yalançı və fırıldaqçı olduğu aşkarlanmışdır. Bununla əlaqədar o, ardıcıllarını durmadan itirməyə başlamışdır. Çünki onun inşa etdirdiyi Puqqaparti kollecində təhsil alan uşaq və gənclərin müntəzəm cinsi zorakılığa məruz qaldığı məlum olmuşdur. Lakin zorakılıqla qarşılaşanlar heç bir adekvat addım ata bilməmişlər. Bunun əsas səbəbi onların ciddi şəkildə nəzarətdə olması və valideynlərinin Sai Babaya pərəstiş etmələri olub. 

Xüsusilə Qərb institutlarının və mərkəzlərinin maliyyə dəstəyi ilə öz təlimlərini yaymağa çalışan sekta üzvləri, Danimarkada artıq İnstitut şəkilində fəaliyyət göstərirlər. 

Şəxsi inkişaf, mənəvi dəyərlərin adı altında öz sektalarını və ideologiyalarını digər ölkələrdə yaymağa çalışan sekta üzvlərinin növbəti hədəfi görünür Azərbaycan olub. Lakin sözügedən cərəyan üzvlərinin Azərbaycana məqsədyönlü və ya təsadüfən gələrək ölkənin öndə gedən müəllimlərinə treninq keçməsi isə bir qədər sual yaradan məsələlərdir.    

Qeyd edək ki, sözügedən cərəyanın dini təlmiləri ilə bağlı video görüntülərə bu linkdə baxa bilərsiz.  (interaztv.com)