Bernard (Şou) əmi deyib ki, bir seyi bacaran kəs iş görur, bacarmayanlar isə basqalarına dərs keçirlər. İndi biz həmin dilbilən amma işbilməzlərin əlində qalmışıq, onların dərslərinə qulaq asırıq. Onlara dərs veriləcəyi halda. Halalca istirahətimiz üçün bizə aid olan Xəzəri də bizə satan kişilər(təkcə oturmaq-15, 20 manatdır) var.  O kişiləri görməzlikdən gələn o biri yekə kişilər isə heç nədən xəbərsiz rolunu oynayırlar. Roldan çıxmaq kimi fikirləri də yoxdur. Sorusanda ki, "filan dəniz sahilində camaatı soyurlar, borca salırlar”. 

Cavab gəlir, "bizdə olan məlumata görə, məsələ belədir”, ya da "ola bilməz”. Güya "qaynar xətt” nömrəsi verirlər? Kimin yadındadır 7 rəqəmdən ibarət həmin nömrə? Axı bu müvafiq orqan rəhbərləri yanlarını qaldırıb şikayət olunan əraziyə birbaşa, şəxsən baş çəkməyə niyə əziyyət çəkirlər ki? Kimdən artıqdırlar axı, Saakaşvilidən artıqdırlar bəlkə? "Mişa müəllim xaricdə təhsilalıb, ondandır sadəliyi” , deyib təsəlli tapanlar, məgər bizim vəzifə sahiblərinin tətili, müalicəsi, qonaqlığı elə xarici ölkələrdə keçmirmi? 

Təhsil, tədris görməsələr, istəməsələr də, qərib diyarlarda ən azı qayda-qanun görürlər ki. Məsələnin bir açması var, insanına xidmət etmək istəyi. Bunlarda özünəxidmət sindromu imkan vermir ki, əl açılsın, cib tikilsin.

Ötən gün yerli və xarici media Qdessa qubernatoru Mixail Saakaşvilinin müavinlərindən yazdı. Xüsusiylə, hamı Yuliya adlı 25 yaşlı köməkçisinin gözəlliyindən danışdı. Amma Mişanın həmin arada daha maraqlı və vacib addımları kölgədə qaldı. 

Belə ki, vəzifəsinin icrası üçün qollarını çırmalayan Saakaşvili bir-birinin ardınca toplantılar keçirib. Korrupsiya ilə mübarizə, dənizkənarı hasarların sökülməsi, həmin qapalı obyektlərin xalqa açılması məsələləri tək Odessa üçün deyil, bizim üçün də xarakterik məsələdir. Saakaşvilinin rəsmi internet səhifəsində bu toplanatı

videolarına baxanda, arzulara qapanmayasan, neyləyəsən? Bizim də çox yox, bir Saakaşvilimiz olsaydı, canımız qismən dincələrdi. Kişi insanların konstitusiya hüquqlarından başlayıb, onların təbii haqlarını sadalayır. Deyir ki, dəniz insanlarındır, axı buranı şəxsi qaraj kimi hasarlamaq və pula satmaq olmaz. Mişa rəsmi şəkildə artıq hasarları sökdürür. 

Odessalı sevinir. Saakaşvilinin səmimiyyətinə ağılsız gürcü milləti qədər şübhə edən özü sərsəmdi. İndi bizim hansı merimiz konstitusiya hüququmuzu bilir ki? Abşeron çimərliyinin, sahililinin və sahilindəki obyektlərin sayını əzbər bildiyi qədər belə bilmir. Bilsəydi, Xəzərə cibi boş halda da baş çəkə bilərdik, suyunda doyunca çimərdik, sahilində dincələrdik. Pul toplayıb, halalca dənizimizə para ilə baş vuracağıqsa, bizdən vətəndaş olarmı heç?

Saakaşvili atana rəhmət, "zabor” yıxan əlinə qurban... odessalının yerində biz də ola bilərdik, amma...

Biz hələ vəzifəli ilə vətəndaş arasındakı "zabor”u sökməyimizə baxaq. O "zabor”u bir yıxa bilsək.

Raminə Eyvazqızı 
(qafqazinfo.az)