3 May-Dünya Mətbuat Azadlığı günü münasibəti ilə “Sərhədsiz reportyorlar” beynəlxalq söz azadlığı təşkilatı dünyada diktator rejimlərinə qarşı mübarizə aparan 100 jurnalist müəyyənləşdirərək, onların adını açıqlayıb. 

“100 qəhrəman jurnalist” adlı siyahı təşkilatın tarixində ilk dəfədir tərtib olunur. Tanınmış azərbaycanlı milli-mədəni fəal, insan haqları fəalı və jurnalist Səid Mətinpurun da adı həmin siyahıdadır. 

GunAZ.TV-nin xəbərinə görə, “Sərhədsiz Reportyorlar” beynəlxalq söz azadlığı təşkilatı bu siyahıda Səid Mətinpuru belə təqdim edib: “Bu məhbus ”Yarpaq” həftəlik dərgisinin jurnalisti, Azərbaycan vilayətinin yerli qəzetlərinin əməkdaşı və kütləvi informasiya vasitələri fəallarından biridir. O, Tehranın inqilab məhkəməsinin 15-ci şöbəsinə çağırıldıqdan sonra həbs edilib və 8 il həbs müddətini başa vurmaq üçün Tehranın Evin zindanına intiqal edilib. 2008-ci il iyunun 11-də elan olundu ki, bu jurnalist həmin məhkəmə tərəfindən xaricilərlə əlaqə qurmaq ittihamına görə 7 və sistemin əleyhinə təbliğ etmək ittihamına görə 1 il həbs cəzasına məhkum edilib. Bu hökm sonra Apelyasiya Məhkəməsi tərəfindən təsdiqlənib. S.Mətinpur 2008-ci il mayın 25-də də saxlanmışdır, lakin sonralar 500 milyon tümənlik mülki vəsiqə qarşılığında azadlığa buraxılmışdır. O azadlığa buraxıldıqdan sonra zindandakı təzyiqlər ucbatından bir çox xəstəlik o cümlədən bel ağrısı və mədə ağrısından əziyyət çəkirdi. O dərman (müalicə) və məzuniyyət hüquqlarından da məhrumdur. Onun məhbusların hüquqlarının təmini uğrunda apardığı gündəlik mübarizə, onu əqidə məhbuslarının şəraitinin yaxşılaşması ilə əlaqədar mücadilədə bir tanınmış simaya çevirib”.

Qeyd edək ki, həmin siyahıda İrandan Adnan Həsənpur, Jila Bəni Yəqub, Siyamək Qadiri və Səid Mətinpurun adlarına rast gəlinir.

Bu arada Tehranin Evin zindanında təkadamlıq məhbəsdə aclıq aksiyası keçirən S.Mətinpurla görüş yasaqlanıb. Fəalın həyat yoldaşı Ətiyyə xanım məhbusla görüş üçün getdiyində məlum olub ki, rejim fəalı cəzalandırmaq üçün onu ailəsi ilə görüş haqqından məhrum edib. Bu barədə Facebook səhifəsində məlumat yazan Ətiyyə xanım bildirib ki, Səid Mətinpur aclıq aksiyasında olduğu halda təkadamlıq məhbəsdə saxlanılır və onunla ailəsinin görüşü də qadağan edilib. Fəalın ailəsinin onun sağlamlıq durumundan nigaran olduğu bildirilir.(musavat.com)