“Bizi bir daha narahat etməyin” 

Adı nurçuluqda hallanan Azərbaycan Respublikası Prezidenti Administrasiyasının Siyasi təhlil və informasiya təminatı şöbəsinin sabiq müdiri Elnur Aslanov vəzifədən uzaqlaşdırılsa da onun mətbuatda “qəhrəman obrazı” davam edir. Yerli media demək olar ki, hər gün onunla bağlı yeni nə isə yazır, araşdırmalar aparır. Bir sözlə cənab Aslanov gündəmdən düşmür. 

Bu günün xəbəri sabiq PA rəsmisinin sözünün qılıncdan kəsərli olan vaxtlarda qurduğu media imperiyasının dağılması ilə bağlıdır. 

Alsanovun nurçularla işbirliyi ifşa edildikdən sonra onun himayəsində də olan KİV orqanlarının taleyi sual altında idi. Odur ki, bu gün mətbuatda “Gün.az”, Bakupost.az kimi tanınmış saytların parçalanması haqda xəbərlər tirajlanır. 

Doğrudur, əvvəlki iqtidarı əldən gedən Aslanovun bu qurumları maliyyə ilə təmin etmək şansı sıfıra bərabər idi. Bu baxımdan onun mediya imperiyasının çökməsi gözlənilən idi.

Aslanov nə PA-da yüksək post tutduğu vaxt, nə də indiki dönəmdə adları çəkilən saytların ona məxsus olduğunu təkzib etmirdi. 

Maraqlı məqam ondadır ki, işdən çıxarılandan sonra o, nə bu barədə, nə də nurçularla bağlı haqqında deyilənlərə reaksiya vermir, boyun qaçırır.

Aslanov bu dəfə də mediadan qaçmağa müvəffəq oldu. Əməkdaşımız Aslanovun Rabitə və Yüksək Texnologiyaları naziriliyində müdiri olduğu Strateji planlaşdırma, investisiya və elmi potensial şöbəsi ilə əlaqə saxlayaraq sabiq PA rəsmisindən açıqlama almağa çalışıb.

Telefonu Alsanovun köməkçisi götürdü. Biz E.Aslanovla danışmaq istəmədiyimizi deyən kimi adını açıqlamayan xanım əməkdaş müdirinin danışmaq istəmədiyini bildirərək onu narahat etməməyimizi vurğulayıb.

“Elnur müəllim mətbuatla əlaqə saxlamaq istəmir. Xahiş edirəm bizi narahat etməyin. Əl çəkin, bir də yığmayın bu nömrəyə”-deyərək Alsanovun xanım işçisi telefonun dəstəyini asdı.

İşçisinin jurnalistə qarşı belə kobud rəftarı görünür birbaşa Aslanovun tapşırığı ilə əlaqədardır.

Bundan öncə də ANS telekanalı sabiq PA rəsmisindən müsahibə almaq üçün onun kabinetinə kimi getsə də Aslanov yanlız bir cümlə idə “hər şey yaxşı olacaq” deyə müsahibədən imtina etmişdi.

Maraqlıdır, Aslanov mətbuatdan niyə qaçır? Bu suala yəqin ki, onun özü bizdən daha yaxşı bilir. (azvision.az)