Bu günlərdə şəhərimizlə bağlı mediada çox ciddi və təhlükəli görünən bir informasiya yayıldı. Məlumatda bildirilirdi ki, Sumqayıtda “cihad əl-nikah”la (seks-cihad) bağlı vərəqələr yayılır: “Suriyada 250 mücahidlə yaxınlıq edən qadın, artıq cihad etmiş sayılır və cənnətə düşür. Belə absurd fitvanı Bəşər Əsəd qüvvələrinə qarşı döyüşən qiyamçı qruplaşmaların əmirləri yayıblar.
Öz növbəsində “cihad əl-nikah” (seks-cihad) barədə fitvanı Sumqayıtda həvariclər dini sektasının nümayəndələri 2 həftə öncə ələ keçirərək, öz aralarında yayıblar. “Həvariclər dini pərdə altında qadınları müharibəyə çəkməyə cəhd edirlər. Məqsəd isə mücahid kişilərin ehtiyaclarını ödəməkdir. Bu barədə mətbuat Sumqayıt şəhər Polis İdarəsinə istinadən məlumat yaymışdı.
“Diqqət çəkəni odur ki, həvariclər sektasına girən qadınlar təhsilli deyillər, hətta çoxu 10-cu sinfi başa vurmayanlardır. Belələrini aldatmaq və cihad etməyə yollanacaqları halda düz yol seçəcəklərinə inandırmaq asandır. Üstəlik, biz bir neçəsi ilə söhbət etmişik. Onlar fitvaya gedəcəkləri halda, Allah yolunda qüvvələrini sərf edəcəklərinə həqiqətən inanırlar” deyə idarədən bildirilib.
İndiyədək həvariclər sektasının 210 üzvünün uçota alındığı məlumdur. Bununla yanaşı, əməliyyatçılar Sumqayıtın II mikrorayonunda yaşayan qadının öz uşaqlarını da götürüb Suriyaya cihada getdiyi barədə məlumat alıblar. Bəzi xəbərlərə görə, qadın ərini atıb. Bu barədə polislərə onun əri deyib. Tam mümkündür ki, o, Suriyaya gedənlər tərəfindən “verbovka” olunması səbəbindən belə qərar verib. Polis qadının valideynləri ilə əlaqə saxlayıb. Valideynlər qızlarının evdə olduğunu desələr də, onun özü ilə danışmaq mümkün olmayıb.
Faktın doğruluğuna inamı yayılmış vərəqələrin fotosunu yaymaqla bir qədər də möhkəmləndirmək olardı. Məsələ ilə bağlı Sumqayıt şəhər Polis İdarəsi ilə əlaqə saxladıq. İdarədən bildirdilər ki, məsələ ilə bağlı yalnız Daxili İşlər Nazirliyi məlumat verə bilər.
DİN-in mətbuat xidmətindən isə "168 saat" qəzetinə bildirilib ki, nazirlik belə bir məlumat yaymayıb, onlarda bu barədə heç bir informasiya yoxdur.
“Bu, təxribat ola bilər”
Bu cür vərəqələrin paylanılması dinimizə uyğun deyil“. Hesab edirəm ki, bu iş haramdır”. Bu sözləri isə fəaliyyətini dayandırmış Əbu Bəkr məscidinin imam-camaatı Hacı Qamət Sumqayıt şəhərində paylanılan dini vərəqələrlə bağlı danışarkən deyib. O bildirib ki, dinimiz heç bir halda qadının 250 kişi ilə cinsi münasibətdə olmasına haqq qazandıra bilməz: “Mümkün deyil, dinimiz belə şeylərə icazə verməz”.
Sumqayıtda paylanan və qadınların cihad edən 250 kişi ilə cinsi münasibətdən sonra cənnətə gedəcəyi fikrini təbliğ edən vərəqələrdən danışan Hacı Qamət bu cür şeylərin təxribat ola biləcəyini də qeyd etməyi unutmayıb: “Bu saat Suriya məsələsi gündəmdədir. Hər kəs onu öz maraqlarına uyğun yozmaq istəyir. Mən dəqiq bilmirəm bunu kimlər təşkil edir, ancaq istənilən halda bunun təxribat olması ehtimalı var”.
Suriyalı qadınlar onlarda belə bir cihad növünün olmadığını bildirir
"Sumqayıtda qadınlara, fətva verərək, cihad əl-nikah(seks-cihad) adı altında Suriyaya mücahidlərlə cinsi yaxınlıq üçün göndərənlər insan alveri ilə məşğul olan qruplardır. Onların məqsədi "seks cihad" yox, əsl seks biznesdir". Bu sözləri isə Qadın Krizis Mərkəzinin rəhbəri Mətanət Əzizova söyləyib. M.Əzizova bu məsələ ilə bağlı Suriyadakı fəal qadınlarla danışıq aparıldığını, onların bu ölkədə belə bir cihad növünün olmadığını söylədiklərini deyir: "Biz bu barədə məlumat aldıqdan sonra Suriyada yaşayan fəal qadınlarla əlaqə saxladıq. Onlar Suriyada belə bir cihad növünün olmadığını bildirdilər və qəti şəkildə bu məlumatı təkzib etdilər. Bizə bildirdilər ki, dində bu cür əməllər günah sayılır. Araşdırmalar zamanı bəlli oldu ki, bu insan alverçilərinin çirkin əməlləridir. Onlar ailələrində problem olan qadınları bu adla cəlb edərək müxtəlif vasitələrlə şirnikləndirərək ölkədən xaricə çıxardır". M. Əzizova son vaxtlar Suriyaya "seks cihad"adı ilə evdən çıxıb insan alverçilərinin şəbəkəsinə qoşulan qadınların da sayının artdığını söyləyir: "Həmin qadınlar evdən çıxdıqda bu adla çıxır ki, ərləri onları axtarmasın. Daha sonra ölkə daxilində seks biznesdə istifadə edilir".
Suriyada nə qədər sumqayıtlı döyüşür?
Mətbuat Suriyada döyüşən azərbaycanlıların təxmini sayını müəyyənləşdirmək məqsədilə Azərbaycanın 40 polis idarəsində sorğu keçirib.
Sorğunun nəticələrinə əsasən, Suriyada Bəşər Əsədə qarşı döyüşən qruplaşmaların tərkibində Xaçmaz, Zaqatala, Qax, Yevlax, Şabran, Oğuz, Quba, Şəki, Qusar və Sumqayıtdan 104 nəfər döyüşüb, onlardan təxminən 60 nəfərə yaxını döyüşlərdə öldürülüb. Suriyaya ən çox azərbaycanlı Sumqayıt şəhərindən (40), Şabran (22) və Qusar rayonlarından (15) gedib. Sorğu zamanı Azərbaycanın əksər rayonlarında Suriyaya gedərək qanunsuz hərbi birləşmələrin tərkibində döyüşən azərbaycanlıların olmadığı müəyyənləşib.
Vüsal 168saat.com
Xəbərdən istifadə edərkən istinad etmək vacibdir.
