"Azərbaycan Prezidenti cənab İlham Əliyevin Mətbuat Şurası İdarə Heyətinin üzvlərini qəbul etməsi və orada dövlətimizin və millətimizin taleyi ilə bağlı strateji əhəmiyyət daşıyan nitq söyləməsi əhəmiyyətli idi”. Bunu millət vəkili, professor Musa Qasımlı Prezident İlham Əliyevin milli mətbuatın yaradılmasının 140 illiyi münasibətilə Mətbuat Şurasının üzvləri ilə keçirdiyi görüş barədə danışarkən deyib.
Millət vəkilinin sözlərinə görə, görüş bir daha göstərdi ki, dövlətimiz mətbuata xüsusi qayğı göstərir: "Bildiyiniz kimi, Azərbaycanda mətbuat tam azaddır, sərbəstdir və jurnalistlər istədiklərini yaza bilərlər. Ölkəmizdə mətbuat üzərində senzura 1998-ci ildən bəri yoxdur. Hazırda çoxlu kütləvi informasiya vasitələri var. Bu gün kim nəyi necə istəyir, elə də yazır".
M.Qasımlı hesab edir ki, cənab Prezidentin Sərəncamı ilə mətbuat işçilərinə dövlət mükafatlarının, fəxri adlarının verilməsi jurnalistlərimizə stimul verəcək: "Arzu edirəm ki, jurnalistlərimizin bütün yazıları dövlətimizin güclü olmasına, millətimizin birliyinə və tərəqqisinə xidmət etsin. Bu gözəl bir bayramdır. Mən çox sevinirəm ki, 1875-ci ildə Həsən bəy Zərdabi tərəfindən əsası qoyulan "Əkinçi”dən başlayan ənənə davam edir. Milli mətbuatımız artıq formalaşıb və dövlətimizə, millətimizə azad fikrə xidmət edir”. (sia.az)
Xəbərdən istifadə edərkən istinad etmək vacibdir.
