Sumqayıtdakı Heydər Əliyev Mərkəzində nikah mərasimlərinin keçirilməsi ənənəsi yaranıb. Artıq bir neçə gündür ki, yeni ailə quran gənclər nikahlarını məhz Heydər Əliyev Mərkəzində rəsmiləşdirirlər.
AzərTAc xəbər verir ki, mayın 3-də yeni ailə quran Abşeron rayonunun Məhəmmədi qəsəbəsinin sakini Xanoğlan Əsədov və paytaxtın Türkan qəsəbəsində yaşayan Xəyalə Balayeva nikahlarını Ulu Öndərin adını daşıyan Heydər Əliyev Mərkəzində təntənəli şəkildə rəsmiləşdiriblər.
Bəylə gəlin əvvəlcə Ulu Öndərin Heydər Əliyev Mərkəzindəki büstünün önünə gül dəstələri qoymuş, xatirəsini ehtiramla yad ediblər.
Nikah mərasimində Sumqayıt şəhər “ASAN xidmət” mərkəzinin qeydiyyat şöbəsinin əməkdaşı qanunvericiliyin verdiyi səlahiyyətlərdən istifadə edərək bəylə gəlinin nikahını rəsmiləşdirmiş, onlara nikah haqqında şəhadətnamə verib.
Yeni ailə quran gənclər həyatlarının ən gözəl günlərindən birini yaşadıqlarını, nikahlarının Heydər Əliyev Mərkəzində qeydə alınmasından qürur hissi keçirdiklərini bildiriblər.
Mərasimdə yeni ailə quranlara xoşbəxtlik arzulanıb.