İlin birinci yarısında Sumqayıt şəhəri üzrə ümumdaxili məhsul istehsalı və xidmətlərin həcmi ötən ilin müvafiq dövrü ilə müqayisədə nəzərəçarpacaq dərəcədə artıb. Artım tempi 9,4 faiz təşkil edib, ümumdaxili məhsulun həcmi 330,0 milyon manat olub. Sənaye məhsulunun həcmi 181,0 milyon manat olmaqla, artım tempi 1,1 faiz təşkil edib. Sənayenin ayrı-ayrı sahələri üzrə də artım müşahidə olunub.

Xeberle.com məlumat verir ki, bu rəqəmlər Sumqayıtda 2015–ci ilin birinci yarısının sosial-iqtisadi inkişafının yekunlarına həsr olunmuş yığıncaqda səslənib.

Sumqayıt şəhər İcra hakimiyyəti Başçsınını müavini Lalə hacıyeva məruzəsində qeyd edib ki, ümumdaxili məhsulun tərkibində qeyri-neft sektorunun payı 75 faizdən çox təşkil edib. İnvestisiya qoyuluşu 7 faiz artmaqla, 28 milyon manata çatıb: "Tikinti-quraşdırma işləri 2,3 faiz, ticarət dövriyyəsinin həcmi 19 faiz, pullu xidmət isə 35,3 faiz artıb. Şəhər üzrə sərnişin daşınmasında 6,3 faiz, rabitə xidmətində isə 3,4 faiz artım əldə olunub.”

Vurğulanıb ki, işsizliyin aradan qaldırılması ilə bağlı mövcud sənaye xarakterli istehsalat sahələrinin genişləndirilməsi, metallurgiya, kimya sənayesi, yüngül, yeyinti və sair sahələrdə inkişafın dəstəklənməsi davam etdirilir. Həyata keçirilən tədbirlər nəticəsində hesabat dövründə 1571 yeni iş yeri açılıb, orta aylıq əmək haqqı isə 400 manat olub.