"Sumqayıt Gənclərinin Hüquqi Maarifləndirilməsi” İctimai Birliyinin prezidenti və "Yüksəliş naminə” qəzetinin baş redaktoru Elçin Məmməd Baş Mütəşəkkil Cinayətkarlığa qarşı Mübarizə İdarəsinə çağırılması ilə bağlı yayılan məlumatlara DİN Mətbuat Xidmətinin rəis müavini Ehsan Zahidovun açıqlamasına münasibət bildirib.

Elçin Məmməd "Turan”a açıqlamasında qeyd edib ki, DİN Mətbuat Xidmətinin rəis müavini Ehsan Zahidovun açıqlaması cəfəngiyatdır və fikri əsas məsələdən yayındırmaq məqsədi daşıyır. "BMCQM-də bildirildi ki, "Front Line Defenders” beynəlxalq hüquq müdafiə təşkilatı Azərbaycanın XİN-nə sorğu verib və E.Məmmədin bu ilin mayın 29-da BMCQM tərəfindən saxlanılması, ölkədən çıxışına qadağa qoyulması, axtarışa verilməsi səbəbləri soruşulub. XİN də öz növbəsində DİN-nə məsələnin araşdırılması üçün müraciət edib və BMCQM-də araşdırma aparılır. Məni may ayında 12 saat niyə saxlayıblar, onun açıqlamasını versinlər və fikri əsas hədəfdən yayındırmasınlar. Orada sözgəlişi borcum olması barədə soruşulub və borcun olmasını təsdiq etmişəm. Həmin banka cəmi 1800 manat borcum var və bununla bağlı bank hər hansı məhkəmə mübahisəsi açmayıb. DİN mətbuat xidməti bu açıqlaması ilə bir daha təsdiq edir ki, Azərbaycan insan hüquq və azadlıqları ilə bağlı götürdüyü beynəlxalq öhdəlikləri yerinə yetirmir və borc öhdəliyinə görə vətəndaşla məhkəmədən kənar danışır. Bir daha polis dövləti olduqlarını sübut edirlər. Borc öhdəliyi mülki məsələdir və mübahisə məhkəmə qaydasında həll edilir. Saxlanmağım borca görədirsə, hansı məhkəmə qərarını yerinə yetirmədiyimə görə saxlayıb xəbərdarlıq ediblər? Ölkədən çıxışıma borca görə qadağan qoyublarsa, hansı məhkəmə bu barədə qərar verib? Onları mənə təqdim etsinlər. "Front Line Defenders”in sorğusuna da XİN Ehsan Zahidovun mətbuata açıqlamasını yazsa, əla olar. Məsləhət görərdim ki, ümumiyyətlə danışmasınlar və danışdıqca batırlar. Məsələ barədə XİN-ə müraciət etmək olar və hər halda onlar bunu araşdırmaq üçün DİN-ə müraciət ediblər. Yəqin artıq narkotiklə, xuliqanlıq və.s arqumentlərlə siyasi fəalları həbs etmək öz effektivliyini itirib, hadisələrə yenilik gətirmək lazımdır. Borc taktikası bəlkə işə yarayar.” – deyə Elçin Məmməd açıqlamasında bildirib. Elçin Məmməd həmçinin, qeyd edib ki, mayın 29-da BMCQM tərəfindən saxlanılması, ölkədən çıxışına qadağa qoyulması, axtarışa verilməsi səbəbləri barədə rəsmi cavab almaq üçün müraciət edib və cavabı aldıqdan sonra BMCQM məhkəməyə veriləcək.