Hər bir şəhərin yazılmamış qanunlara görə elə şəhər statusunu daşıması, daha sevimli və gözəl olması üçün orada vaxtınızı səmərəli keçirmək, istirahət etmək üçün lüks məkanların mövcudluğu çox vacibdir. Bu məkanlara "mall”, əyləncə mərkəzləri, hotel, kinoteatr, kafe, restoran, pub və sairləri misal çəkmək olar. Təəssüf ki, mall, əyləncə mərkəzləri, hotel, kinoteatr sarıdan Sumqayıtın bəxti gətirməyib. Bir müddət əvvəl şəhərdə 44-cü məhəllədə TERM adlı hotel, N.Nərimanov adına Mədəniyyət Sarayının nəzdində kinoteatr fəaliyyət göstərsə də, indi onlar tarixin arxivinə qovuşub. "Mall” adı – başlığı (Cavid Mall) isə şəhərin mərkəzində yerləşən Cavid ticarət mərkəzinin qarşısında yazılsa da, burada "mall” adına nəsə görmək çətin məsələdir. Əslində "mall” statusunu daşımaq üçün bir çox parametrlərə sahib olmaq lazımdır və bu yazımızda Cavid ticarət mərkəzinin neçə faiz mall-a uyğun olub olmadığını analiz etmək fikrindən uzağıq.
Əslində, böyük biznes maraqlarını həyata keçirmək arzusunda olan bir çox iş adamları üçün Sumqayıt kasıb, çətin şəhərdir. Amma, deyəsən, bunun əksini düşünən sahibkarlar da var. Belə olmasaydı, şəhərdə bahalı, lüks məkanların - kafe, restoran, şadlıq sarayı, geyim butiki, parfüm mağazası, estetik mərkəz və sair kimi obyektlər olmazdı.

Müşahidələrimizə görə son illər Sumqayıtda açılan müxtəlif xidmət obyektlərinin böyük əksəriyyəti qiymətlərin yüksək olması ilə seçilir. Bir çox hallarda isə o qiymətə müvafiq keyfiyyət və servisi görmədikdə pəjmürdə olmamaq olmur.

Sumqayıt sakinləri arasında müxtəlif üsullarla (canlı, onlayn, telefon) aparılan sorğuda respondentlər tərəfindən "Zəfəran”, "Şeş beş”, "Moxito” kimi kafelər, "Forte”, "Turan”, "Park Restoran” "Amor” kimi restoranlar, "Xəlifə”, "Green House”, "Luxery Palace”, "Nur” şadlıq sarayı şəhərin ən lüks, eyni zamanda bahalı məkanı kimi qeyd edilib.

Amma sorğu zamanı elə məkanların adları çəkilib ki, burada qiymət bahalığından giley-güzar olmayıb. Bunları Sumqayıtın ən lüks məkanları kimi qeyd ediblər.

Başqa mədəniyyətə və mentalitetə malik olmağımıza baxmayaraq artıq xeyli vaxtdır ki, şəhərimizdə pablar geniş yayılıb. Razılaşın ki, ağır iş günündən sonra və ya bekar axşamlarda "öz Pabını", sevimli məkanını, sakit limanını tapmaq çox vacibdir.
Şəhərin 9-cu mikrorayonunda "Aygün" şadlıq evinin yaxınlığında yerləşən "Corona PUB" bu baxımdan fərqlənir. Bu pab sakit və komfortlu atmosferi ilə fərqlənir. Barda müxtəlif içki məkanlarında istifadə olunan elementlər toplanıb. Dizaynerin uğurlu rəng seçimi, düzgün işıqlandırma işi, yaxşı seçilmiş içkilər – bütün bunlar məkanın müvəffəqiyyətinin səbəbidir. Pabın administrator söylədi ki, həmişə işdən sonra bura gəlib kişi kampaniyasında dincəlmək, idman kanallarına baxmaq, pivə içmək və sevimli komandaya azarkeşlik etmək olar. Burada pivə həvəskarları öz sevimli içkilərindən içə-içə dostlarının əhatəsində maraqlı vaxt keçirə bilərlər. "Corona PUB" dostlarla görüşün ideal məkanı, səs-küylü dost əhatəsi üçün əla yerdir: "Bu paba gedib onun təkrarsız aurasından zövq almaq əsl istirahətdir. Pabın atmosferi dincəlməyə və yaxşı pivə içərək söhbət etməyə uyğundur. Bunu hiss etmək üçün mütləq bu yerlərə baş çəkmək lazımdır”.

Buranın interyeri pab ənənəsinə uyğun hazırlanıb: taxta oturacaqlar və palıddan hazırlanmış masalar, divarların və döşəmənin taxta örtükləri, dekorun taxta elementləri və az tutqun işıq – bütün bunlar rahatlığın və qonaqpərvəliyin təkrarsız atmosferini yaradır. Bu məkanda həmçinin müxtəlif kokteyllər dətəklif edilir. "Corona”nı şəhərimizin ən maraqlı və gözəl dizaynlı pabı hesab etmək olar.

Gah kafe deyirik, gah da restoran. Əslində isə pitseriyadır. Nəriman Nərimanov küçəsi ilə 20 Yanvar küçələrinin kəsişməsi, "Karvan” TM-in yanında yerləşən "Bibər Pizza”nı inamla Sumqayıtda ən dadlı pitsanın məkanı adlandırmaq olar. Administrator Kamran bəy bildirir ki, gərgin işin yorğunluğunu "Bibər Pizza”da çıxarmaq olar: "Burada dadlı, ləziz təamlar, yüksək servis var, ailə və dostlarınızla birgə dincələcəyiniz ideal və sakitləşdirici məkandır. Bir zənglə "Bibər Pizza”nın 25 növdən artıq italyan və türk pitsasını sifariş edə bilərsiniz. Bunun üçün əlavə xərcə düşməyəcəksiniz: çatdırılma isə pulsuzdur”

"Art” kafe təkcə qiyməti ilə deyil, Sumqayıtda qeyri-adi menyusu ilə seçilən kafelərdən biridir. Kafedə sırf türk, rus və Avropa mətbəxinin yemək və məşhur desertləri üstünlük təşkil edir. Kafedə sakit və romantik ab-hava hökm sürür. İnzibatçı Elgün İbişovun dediyinə görə, müştəriləri kafenin menyusunda xarici mətbəxin yeməkləri olması maraqlandırır. Özü də kafeyə gələnlərin əksəriyyətini sadə sumqayıtlılar təşkil edir. Ağız dadını dəyişmək istəyənlər məhz "Art” kafeyə üz tuturlar. E.İbişov onu da bildirdi ki, Sumqayıta ilk dəfə bu menyunu onlar gətiriblər.

Sumqaytda yeni - kübar bir restoran – "Park Palace" mövcuddur ki, bu məkanda həm dostlarla, həm ailəvi çox gözəl istirahət etmək olar. Xaricən klassik üslubda olsa da, daxilən bu restoran avanqard və müasir üslübda qurulub. Bu restoranın ayrıca 420 nəfərlik şadlıq evi də var. Restoranın administratoru söylədi ki, buranın aurası insana çox müsbət təsir edir və ən mühüm özəlliklərdən biri şəhərin mərkəzində yerləşməsinə baxmayaraq çox sakit bir məkanda fəaliyyət göstərirlər. Ən əsası isə restoran yamyaşıl, havası təmiz olan Bələdiyyə parkında - keçmiş Vaqif klubunun yerində yerləşir.

Müşahidələrimizdən belə aydın oldu ki, Sumqayıtda lüks məkanların xidmət keyfiyyəti yaxşı səviyyədədir, amma əla deyil. Kafe və restoranlar yemək və içkilərin keyfiyyətinə görə seçilir. Kifayət qədər bahalı restoranlar da mövcuddur. Bəzi məkanlar rahatlığı və gözəlliyi ilə yanaşı, təmizliyi ilə də hər kəsi cəlb edir. Bəlkə də bu üzdən bahalı məkanların müştəriləri arasında sadə sumqayıtlılar da görünməyə başlayır. Belə çıxır ki, kasıb şəhərin sakinləri artıq "ucuz ətin şorbasını” yemək istəmirlər?! Təki ödədikləri pula görə əldə etdikləri servis ürəklərincə olsun.