Bu gün Əmək və Əhalinin Sosial Müdafiəsi Nazirliyi (ƏƏSMN) yanında Dövlət Əmək Müfəttişliyi Xidmətində cari ilin birinci rübü ərzində respublikada əmək qanunvericiliyinə əməl olunmasına dövlət nəzarətinin həyata keçirilməsi sahəsində görülən işlər və qarşıda duran vəzifələrin müzakirəsinə həsr olunan müşavirə keçirilib. Nazirliyin ictimaiyyətlə əlaqələr şöbəsindən  verilən xəbərə görə, müşavirədə 2014-cü ilin I rübü ərzində Dövlət Əmək Müfəttişliyi Xidmətinə 1385 sənəd daxil olub, həmin sənədlərdən 885 ədədi ərizə 500 ədədi məktub xarakterli olduğu qeyd edilib.
 

Cari ilin I rübü ərzində Xidmət tərəfindən həyata keçirilən dövlət nəzarəti zamanı ayrı-ayrı müəssisələrdə əmək qanunvericiliyinin pozulması ilə bağlı ümumilikdə 3277 fakt aşkar edilib. Həmin hüquq pozuntuları ilə bağlı İnzibati Xətalar Məcəlləsinin müvafiq bəndlərinə uyğun olaraq, aidiyyəti işəgötürənlərə tətbiq olunan cərimələrin məbləği ötən ilin I rübünə dair müvafiq göstərici ilə müqayisədə 14,1 dəfə çox olub. Tətbiq olunmuş cərimələr üzrə ödənilən məbləğ isə 2013-cü ilin ilk rübündə ödənilən məbləğlə müqayisədə 21,1 dəfə artdığı vurğulanıb.
 

Əmək qanunvericiliyinə əməl olunması, o cümlədən işçi vətəndaşların əməyinin mühafizəsi sahəsində işəgötürənlərdə məsuliyyət hissinin artırılmasının əsas məqsədlərdən olduğunu qeyd edən Fuad Əlizadə qeyri-leqal məşğulluq hallarına qarşı tədbirlərdən də danışıb.

Qeyd olunan müddətdə ayrı-ayrı müəssisələr üzrə 2951 nəfər işçi ilə əmək münasibətlərinin əmək müqaviləsi əsasında rəsmiləşdirilməsi təmin olunub, əmək kollektivləri arasında tərəflərin razılığı əsasında əmək münasibətlərinə dair əlavə şərtləri müəyyən edən 88 kollektiv müqavilə bağlanılıb. Cari ilin yanvar-mart aylarında işçilərə ödənilməsi gecikdirilmiş ümumilikdə 153 min 952 manat məbləğində sosial xarakterli ödəmələrin ödətdirilməsinə nail olunub. Həmin vəsaitlərin 143 min 796 manatını əmək haqları, 7277 manatını zərərə görə ödənclər, 2879 manatını isə sosial müavinət və kompensasiyalar təşkil edib.
 

Xidmət rəisi əmək hüquqlarının təminatı sahəsində aparılan islahatlardan söz açaraq, Əmək Məcəlləsində dəyişikliklər edilməsi ilə bağlı qanunun tətbiqi barədə Azərbaycan Prezidentinin 2014-cü il 3 fevral tarixli Fərmanının icrası ilə əlaqədar, əmək müqaviləsi bildirişlərinin elektron şəkildə qeydiyyata alınması üçün elektron informasiya sisteminin cari il iyulun 1-dən tətbiq olunacağını da bildirib.
 

Müşavirədə 4 region rəisinə işlərində yol verdikləri nöqsanlara görə intizam tənbehi verilib.
 

İclasda cari ilin yanvar-mart aylarında görülmüş bütün işlərin nəticələri təhlil olunub, həmçinin qarşıda duran vəzifələr müzakirə edilib.(lent.az)