Ölkə başçısının tapşırığına əsasən Ailə Qadın və Uşaq problemləri üzrə Dövlət komitəsinin sədri Hicran Hüseynova Sumqayıtda yerləşən Qubadlı Rayon Təhsil şöbəsinin inzibati binasında vətəndaşları qəbul edib. Sonra Rayon İcra Hakimiyyətinin inzibati binasında Qubadlının ictimai- siyasi və mədəni həyatındakı fəal qadınlarla ”Milli mənəvi dəyərlərin daşıyıcısı olan ailə sağlam cəmiyyətin özülüdür” mövzusunda görüş keçirilib.
Qəbulda Qubadlı, Şuşa, Zəngilan rayonlarından olan məcburi köçkünlər, eləcə də Abşeron və Sumqayıt sakinləri iştirak edib. Ailə, Qadın və Uşaq Problemləri üzrə Dövlət Komitəsinin sədri Hicran Hüseynova hər bir vətəndaşın müraciətini diqqətlə dinləyib.
Müraciətlər əsasən qadın hüquqlarının müdafiəsi,məşğulluq,sağlamlıq, qızların təhsildən yayınması, erkən nikah və boşanmaların yaratdığı problemlər, boşanmadan sonra əmlakın bölüşdürülməsi məsələləri ilə əlaqədar olub. Qəbul zamanı sakinlərin bəzi şikayətləri yerindəcə həllini tapıb, digər müraciətlər isə müvafiq qurumlara çatdırılmaq üçün qeydiyyata alınıb.
Sonra Qubadlı Rayon İcra Hakimiyyətinin akt zalında rayonun ictimai siyasi və mədəni həyatında fəal olan qadınlarla görüş keçirilib. Ailə, Qadın və Uşaq Problemləri üzrə Dövlət Komitəsinin sədri Hicran Hüseynova bildirdi ki,cəmiyyətin və dövlətin formalaşması və inkişafında ailə mühüm vasitədir.Komitə sədri qeyd etdi ki, ailə xalqın yüksək mənəvi dəyərlərinin qoruyucusu, genefondun daşıyıcısı kimi mühüm rola malikdir. Azərbaycan cəmiyyətində ailə institutu özünün sosial təyinatını və milli-mənəvi missiyasını dolğun şəkildə qoruyub saxlamaqdadır.
Qubadlı Rayon İcra Hakimiyyətinin başçısı Malik İsaqov vurğuladı ki, ümummilli lider Heydər Əliyevin ölkəmizə rəhbərlik etdiyi dövrlərdə ailə siyasətinin formalaşdırılması məsələlərinə böyük diqqət yetirilib, mövcud olan problemlərin həlli istiqamətində ardıcıl və məqsədyönlü tədbirlər görülüb, bu sahədə hüquqi baza yaradılıb.Bildirildi ki, Ümummilli liderimizin yolunu uğurla davam etdirən Azərbaycan Respublikasının Prezidenti cənab İlham Əliyevin rəhbərliyi altında həyata keçirilən sosial-iqtisadi siyasət ailələrin rifahının yaxşılaşdırılmasına, sosial müdafiəsinin gücləndirilməsinə, uşaq və yeniyetmələrin həm fiziki, həm də mənəvi cəhətdən güclü nəsil kimi formalaşdırılmasına, ümumən, milli genefondumuzun möhkəmlənməsinə xidmət edir. Görüşdə bir sıra təkliflər və müraciətlər irəli sürülüb.Qadınları narahat edən məsələlər ətrafında fikir mübadiləsi aparılıb.

Xeberle.com