Rusiya Federasiyasının Tatarıstan Respublikasının Leninaqorsk şəhərinin 60 illik yubileyi ilə əlaqədar böyük Şəhər günü tədbiri keçirilib. Tədbirdə Respublika prezidenti Rüstəm Minnixanov, şəhər və respublika rəsmiləri, həmçinin Leninaqorskda fəaliyyət göstərən millətlərin icmaları iştirak ediblər. Tədbirdə Leninaqorskda yaşayan hər bir xalqın nümayəndələri müvafiq çadırlar qurublar. Sevindirici haldır ki, şəhər günündə həmyerlilərimizin yaratdığı "Birlik" təşkilatının rəhbərliyi və nümayəndələri də təmsil olunublar. "Birlik" təşkilatının sədri Ramiz Məmmədovun Xeberle.com-a verdiyi məlumata görə, yubileydə milli musiqilərimiz, rəqslərimiz, həmçinin milli mətbəximiz tədbir iştirakçılarına nümayiş etdirilib: "Şəhər tədbirində Azərbaycan icması olaraq yüksək səviyyədə təmsil olunduq. Açılışı "Sarı gəlin" xalq mahnısının sədaları altında milli rəqsimizlə başladıq. Milli mətbəximiz və Azərbaycanın mədəniyyətini, tarixini əks etdirən suvenirlər iştirakçılar tərəfindən böyük maraq və sevinclə qarşılandı. Rəsmi şəxslər, şəhər ictimaiyyəti, sakinlər çıxışımızı çox yüksək dəyərləndirdilər. "Birlik" təşkilatı olaraq Leninaqorsk şəhərində həm Azərbaycanın əlamətdar, tarixi günlərini, həmçinin Tatarıstan Respublikası və Rusiya Federasiyasının əlamətdar günlərini keçiririk. Bundan sonra da şəhərin ictimai mədəni həyatında fəal olmağa çalışacağıq.

Yeri gəlmişkən, şəhərin 60 illiyi münasibətilə kitab nəşr olunub. Kitabda şəhərdə fəaliyyət göstərən azərbaycanlıları özündə birləşdirən "Birlik" təşkilatı haqqında geniş məlumat yer alıb. Bununla yanaşı, nəşrdə Azərbaycanın başına gətirilən müsibətlər barəsində də informasiyalar əks olunub. Kitabda, həmçinin Xocalı soyqırımından da bəhs olunur. 

Leninaqorsk şəhərində Azərbaycan Mədəniyyət Evinin açılmasını planlaşdırırq. Bu istiqamətdə müəyyən işlərə başlamışıq", - deyə R.Məmmədov söyləyib.
Xeberle.com