“Uğurun sirri” layihəsinin növbəti qonağı “Oracle” İstifadəçilər Qrupunun prezidenti, “Azərcell”in İnformasiya Kommunikasiya Departamentində Verilənlər bazası mütəxəssisi, peşəkar idmançı, İnformasiya Texnologiyaları İnstitutunun doktorantı Kamran Ağayevdir.
Uğurun rəngi, dadı, qoxusu, səsi, görüntüsü necədir və ona toxunmaq nə zaman mümkündür?
- Uğurun rəngi bəmbəyaz, qoxusu təravətlidir. Ona toxunmaq, illərdir davamlı çəkilən əziyyət nəticəsində mümkündür. Sizə uğurun sirrini deyim? Bir gün bir nəfər bunu bir alimdən soruşur. Alim onu dəniz kənarına dəvət edir. Onların ikisi də dənizə girir. Alim, o adamın başını suya salır və bir müddət saxlayır. Adam boğulmağa yaxın başını çıxarır və ondan soruşur: “Başın suyun içində olanda nə düşünürdün?” Adam deyir: “Əlbəttə, ancaq və ancaq nəfəs almağı düşünürdüm”. Alim ona deyir: “Nə zaman ki, müvəffəqiyyətli olmağı da, nəfəs almaq qədər istəyəcəksən, onda müvəffəqiyyətli olacaqsan”
Deyirlər, yanlışlar olmadan doğrular tapılmaz. Uğursuzluq yanlışlardanmı doğar?
- Bu tamamilə doğrudur. Əslində, müvəffəqiyyətin bir sirri yoxdur. O, ağır hazırlığın və uğursuzluqdan dərs almağın nəticəsidir.
Apardığınız mübarizədə uğursuzluqlarla üzləşəndə nə edirsiniz?
- Bir daha cəhd edirəm. Yenə alınmır, bir də edirəm və bunu alınana qədər təkrarlayıram. Yəni bu qədər bəsit ...
Hər insanda bir istedadın olduğunu söyləyərlər, bunu necə üzə çıxarmaq olar?
- İnsan daxildən gələn səsi dinləməlidir. Daxildən gələn səsin arxasınca getsə, ALLAHın izni ilə müvəffəqiyyətli olar. Mən əminəm ki, hər bir insanın özünəməxsus istedadı var. Sadəcə bunu kəşf edib arxasınca getməlidir.
Bəzi gənclər bir işə başlayanda “Düşün, tətbiq et və nəticələndir” prinsipini unudurlar. Yəni, onlar düşündüklərini ya tətbiq etmir, ya da nəticələndirmirlər. Bu problemlə üzləşənlərə nə söyləmək istərdiniz?
- Tətbiqsiz düşüncə, düşüncə olaraq qalacaq. Nəticə isə tətbiqdən sonra gəlir. Bunlar bir-birlərinə bağlıdır, biri olmadıqda digəri olmaz. Sadəcə insan özündə iradə tapıb düşüncəsini tətbiqə, tətbiqini nəticəyə çevirməlidir.
Övladlarınızın gələcəkdə uğurlu ola bilməsi üçün nə edirsiniz? Daha fərqli davrana bilirsiniz?
- Öncə insan öz övladlarına örnək olmalıdır. Özü müvəffəqiyyət üçün ciddi çalışmalıdır ki, övladı ondan ibrət alsın. Məncə övladı heç nəyə məcbur etmədən istiqamətləndirmək lazımdır. Müvəffəqiyyətli və əzmkar olmaq hissini ona aşılamaq lazımdır.
Sizcə, insanların ən güclü silahı nədir - ağıl, yoxsa ürək?
- Ürək, qanı digər orqanlara çatdıran bir orqandır. Məncə insanın ən güclü silahı ağıldır.
Uğurun yaşı olur yoxsa başı, bu barədə nə düşünürsünüz?
- Əlbəttə ki, başı olur. Məncə hər bir yaşda uğurlu olmaq mümkündür.
Fərqliliyiniz və fərdliliyiniz haqında nə deyə bilərsiniz? Nəyə görə Siz sizsiniz?
- Zənnimcə, ən böyük müsbət cəhətim qarşıma qoyduğum bütün məqsədlərə nail olmaq üçün gecə-gündüz əzmlə çalışmağım, heç bir zaman həvəsdən düşməməyim və iradəli olmağımdır. Çox bəsit prinsipim var: “Kimsə bunu edibsə, mən də edə bilərəm”. Onu da qeyd edim ki, bunların hamısını atamdan öyrənmişəm.
İnanmaq asandır, yoxsa inandırmaq?
- İnanmaq daha asandır.
Həyatın enini və uzununu ölçdünüzmü heç, yaşamı üzün edən nədir?
- Yaşamı uzun edən ətrafında olan insanlara yaxşılıq etməyin və Peyğəmbərimizin buyurduğu kimi çoxlu sədəqə verməyindir. Ömrü müəyyən edən ALLAHdır, ancaq insan səhər-axşam digər insanlara yaxşılıq etdikcə ömrünün uzandığını hiss edir. Az ömür sürsə belə, həyat dolu bir ömür sürmüş olur.
Əgər Sizə dünyada yalnız bir şeyi dəyişdirmək imkanı verilsəydi, nəyi dəyişərdiniz?
- Kasıb və varlı təbəqənin olmamasını istərdim.
Həyat toplananlar, çıxılanlar, vurulanlar və bölünənlərdən ibarətdir deyirlər, Sizin payınıza ən çox hansı əməl düşüb?
- Demək olar ki hamısı.
Bəs, Siz özünüz özünüzə dost ola bilsəydiniz, özünüzə sizin kimi bir dost istəyərdinizmi?
- Əlbəttə. Mənim ən yaxın dostlarımdan biri elə özüməm. Pis anlarımda içimdən ikinci bir mən çıxıb yanımda oturur və mənə məsləhətlər verir.
Uğurlu olmaq istəyənlərlə gərəkli məsləhət versəydiniz, nə deyərdiniz?
- Qarşısına qoyduğu məqsədə çatmayana qədər təslim olmamasını, böyük iradə göstərməsini məsləhət verərdim.
Hesab - kitab dəftəriniz var?
- Əlbəttə. Hər günün, ayın və ilin sonunda özümə hesab verib növbəti addımlarımı müəyyən edirəm.
Təbliğ etdiyiniz gerçəklər hansılardı, necə düşünürsünüz sevginin təbliğata ehtiyacı varmı?
- Təbliğ etdiyim ən böyük gerçək bu əzəmətli dünyanın, orda olan canlıların - bitkilərin, heyvanların və insanların Yaradıcısı olan ALLAHın varlığıdır. Bunu dərk etmək üçün xüsusi zəkaya malik olmaq da şərt deyil. Məgər günəşin varlığı üçün kimsə sübut soruşurmu? İndiki halımızda, insanların çoxunun var-dövlət arxasınca getdiyi günlərdə sevginin təbliğatına böyük ehtiyac var.
Yaşamaq və var olmaq arasında fərq nədir?
- Yaşamaq, keçirdiyin anları dərk etmək, hiss etmək deməkdir. Yaşamaq, öz xəyallarını həyata keçirmək və ətrafında olan insanlara faydalı olmaqdır. Var olmaq isə, heç bir məna kəsb etmədən cismən mövcud olmaqdır.
Cəfər Mənsimi
/azadinform.az/
