Xəbər verdiyimiz kimi, yanvarın 28-də Tovuzun Əlibəyli kəndində saxlanılan Ermənistan vətəndaşı Mamuko Xocayan Ermənistana geri qaytarılandan sonra ölüb. 

Bu xəbər KİV-lərin manşetlərinə çıxmamış, erməni təxribatçıları bütün dünyaya Mamikonun guya Azərbaycanda zəhərləndiyi xəbərini yaymağa başladılar. Ermənilərin iddialarına görə, Mamikonun cəsədi ekspertizaya verildikdən sonra onun qanında həyat üçün təhlükəli maddə, bədənində isə işgəncə izləri-əzik və sınıqlar aşkarlanıb. 

Bu yalanı ilk yayan Ermənistanın birinci ombudsmanı, Əsir və Girovlarla bağlı Dövlət Komissiyasının üzvü Larisa Alaverdiyan məsələ ilə bağlı Azərbaycanın Avropa İnsan Haqları Məhkəməsinə veriləcəyini bildirib. Artıq ermənilər bu məqsədlə yerli həkimlərin bütün ”tapıntıları” əsasında saxta sənədlər toplamağa başlayıblar. 

Xatırladaq ki, yanvarın 28-də erməni kəşfiyyat-diversiya qrupu Tovuz rayonun Əlibəyli kəndi istiqamətində qoşunların təmas xəttini keçməyə cəhd ediblər. Qısa atışmadan sonra erməni təxribatçıları geri çəkilib, qrupun bələdçisi Mamikon Xocayan isə Azərbaycan əsgərləri tərəfindən saxlanılıb. 

Ermənistan tərəfinin Azərbaycana qoca kişinin bələdçiliyi ilə diversant göndərməsinin səbəbləri dəqiq məlum olmasa da, qocanın yaşını nəzərə alaraq ona mülayim davaranıldığı məlumdur. Qırmızı Xaç nümayəndələrinə çoxsaylı müsahibələrində Mamikon Xocayan, hər dəfə Azərbaycanda ona onunla yaxşı rəftar olunduğunu və özünü yaxşı hiss etdiyini təsdiq etmişdi. Martın 4-də Azərbaycan M. Xocayanı Ermənistana təhvil verəndən sonra isə işgəncəyə məruz qaldığını deməyə başladı.

Lakin ağılı başında olan hər kəs, ermənilərin 77 yaşlı qocaya zəhər verildiyi ilə bağlı yalanlarına uymaz. Hər şeydən əvvəl ona görə ki, 77 yaşlı qocanın Azərbaycana göndərilməsinin özü bir təxribatdır. Ermənilər bunu düşünülmüş şəkildə ediblər ki, sonradan Azərbaycanı hətta qocalara da işgəncə verən qəddar bir ölkə kimi təqdim etsinlər. Ancaq dəfələrlə bu cür hallarla rastlaşan Azərbaycan, erməni təxribatlarına uymayacaq qədər təcrübə qazanıb. 

İkincisi, əgər Xocayanı Azərbaycanda zəhərləmişdilərsə də, onda nə üçün Ermənistana qaytardılar, onu Bakıda saxlayıb daha sonra infarktdan öldü demək daha asan olmazdımı? 

Görünür ermənilərin məntiqi bunları düşünəcək qədər dərin deyil, buna baxmayaraq yaranmış vəziyyətdən istifadə edərək onlar Azərbaycana qarşı təxribatlarına davam edəcəklər.