İllərdir ki, Sumqayıt sakinləri şəhərin bərbad yollarından şikayətçidir. Əvvəlki icra başçısı şəhərin mərkəzi yollarının bir neçəsini təmir etdirsə də, Sumqayıtda bəs deyincə qədər nahamar yol problemi qalmaqdadır, xüsusən şəhərin kənar mikrorayon və məhəllələrində. Sumqayıtın "33 saylı” problemi başlığı təsadüfən seçilməyib. Çünki şəhərin nisbətən yeni yaşayış hissələri sayılan 20-ci mikrorayonla 21-ci mikrorayonu bir-birindən ayıran yol hələ insanlar burada məskunlaşandan bərbad vəziyyətdədir. Bəlkə də elə ay olmaz ki, Xeberle.com portalına 33 saylı marşrut avtobusunun yolunun bərbad durumundan şikayət daxil olmasın. Bu dar yol uzanaraq şəhərin bağlarına qədər gedib çıxır. Və orada da xeyli sayda insan yaşayır. Bu yol həm də MƏKTƏB YOLUdur, 2 saylı məktəb elə bu yolun GİRİŞində yerləşir. Sözügedən mikrorayonlar və bağlarda yaşayan bir xeyli şagird hər gün bu palçıqlı, tozlu, nahamar yolla bilik, təhsil almağa gəlir. Yağış yağanda oralar lap bərbad vəziyyətdə olur.

Yeri gəlmişkən, bu fotolar da məhz 2 nömrəli məktəbin qarşısından çəkilib.
Zakir Fərəcov Sumqayıta başçı təyin olunandan bir həftə sonra ilk müşavirəsində şəhərdəki abadlıq-quruculuq işlərindən, yol və binaların problemlərindən söz açarkən xüsusilə vurğuladı ki, hər kəs abadlıq işlərinə mərkəzdən başlayır, biz isə bu dəfə kənarlardan, elə 17-18-ci mikrorayonlardan başlayacağıq. Hətta ilk addım da atıldı, 18 saylı marşrut avtobusunun yolu dəyişdirildi. Amma sumqayıtlılar bunun davamını çox gözləyir.
Xatırladaq ki, 17-18-ci mikrorayonlardan öncə Sumqayıtın 20 və 21-ci mikrorayonları gəlir. Onlar şəhərin şərq hissəsindən ən kənar mikrorayonlarıdır. Bəlkə elə bu mikrorayonları ayıran, bu hissənin əsas gediş-gəliş yolu sayılan 33 saylı marşrut avtobusu növbəti olsun?! Hər halda yeni mikrorayonların köhnə problem olduğu üçün…

Elnur Ağayev
Foto: Məftun Ənvəroğlu
Xeberle.com

P.S. Yağış demişkən, artıq başlayıb, payız fəslinin "ortası”nı yaşayırıq, hələ qış qarşıdadır.