Fövqəladə Hallar Nazirliyinin (FHN) 10 illik yubileyi münasibətilə Dövlət Yanğından Mühafizə Xidmətinin (DYMX) və FHN işçiləri Həmkarlar İttifaqının təşkilatçılığı ilə keçirilən yanğın-xilasetmə idmanı üzrə respublika birinciliyi başa çatıb.

FHN-dən AZƏRTAC-a bildiriblər ki, respublika birinciliyində yanğın-xilasetmə idmanı üzrə zonalar üzrə keçirilmiş birinci mərhələdə qalib gələrək finala vəsiqə qazanmış iştirakçılar mübarizə aparıb.

Turnirdə 13 komanda və 150 idmançı üç mərhələdə - təlim qülləsinə qalxmaq, 100 metrlik maneə zolağını dəf etmək və döyüş açılışı üzrə yarışlarda qüvvələrini sınayıblar.

Yanğın-xilasetmə idmanı üzrə respublika birinciliyinin başa çatması münasibətilə DYMX-nin idman-məşq kompleksində keçirilən təntənəli mərasimdə Dövlət Yanğından Mühafizə Xidmətinin rəisi, daxili xidmət general-mayoru Füzuli Əsədov, FHN işçiləri həmkarlar ittifaqının sədri Mehman İsmayılov çıxış edərək bu gün ölkəmizdə, o cümlədən Fövqəladə Hallar Nazirliyində idmanın tərəqqisinə göstərilən qayğıdan danışıblar. Natiqlər yanğınların söndürülməsində tətbiq olunan döyüş hərəkətləri kompleksindən ibarət olan yanğın-xilasetmə idman növünün inkişaf etdirilməsinin, bu sahəyə əməkdaşların daha çox cəlb olunmasının vacibliyini vurğulayıblar.

Tədbirdə yanğın-xilasetmə idmanı üzrə respublika birinciliyinin qalibləri elan olunub.

Təlim qülləsinə qalxmaq üzrə yarışda Sumqayıt şəhər Dövlət Yanğından Mühafizə İdarəsinin əməkdaşı Ağarəsul Bağıyev birinci, Nəsimi rayon DYMH-nin əməkdaşı Seymur Məmmədov ikinci, Azərbaycan Respublikası Dövlət Neft Şirkətinin (SOCAR) obyektləri üzrə Yanğından Mühafizə İdarəsinin əməkdaşı Rüstəm Salayev isə üçüncü yerə çıxıblar.

Yüz metr məsafəyə maneəli zolaq üzrə yarışda isə qalib SOCAR-ın obyektləri üzrə Yanğından Mühafizə İdarəsinin əməkdaşı Asəf İbrahimov olub. Sumqayıt şəhər Dövlət Yanğından Mühafizə İdarəsinin əməkdaşı Vüsal Tahirov ikinci, SOCAR-ın müvafiq idarəsinin əməkdaşı Məhəmməd Əhmədzadə isə üçüncü olublar.

Döyüş açılışı üzrə yarışda da SOCAR-ın obyektləri üzrə Yanğından Mühafizə İdarəsinin, Nəsimi rayon DYMH-nin və Sumqayıt şəhər Dövlət Yanğından Mühafizə İdarəsinin komandaları ilk üç pillədə qərarlaşıb.

Yanğın-xilasetmə idmanı üzrə respublika birinciliyinin nəticələri ümumiləşdirilərək komanda hesabında qaliblər müəyyənləşdirilib.

SOCAR təmsilçiləri komanda hesabında qalib olublar. İkinci yeri Sumqayıt şəhər Dövlət Yanğından Mühafizə İdarəsinin, üçüncü yeri isə Nəsimi rayon DYMH-nin komandaları tutub.

Füzuli Əsədov, Mehman İsmayılov və yanğın-xilasetmə idmanı üzrə respublika birinciliyinin baş hakimi - Dövlət Yanğından Mühafizə Xidmətinin rəis müavini, daxili xidmət polkovniki Rasim Kərimov qaliblərə medal və diplomlar, qiymətli hədiyyələr təqdim ediblər.