Ölkənin gündəmi milli təhlükəsizlik naziri Eldar Mahmudovun qəfil vəzifəsindən azad edilməsi və bunun ardınca yaşananlarla bağlı xəbərlərlə çalxalanır. 
İlkin iddialara görə, Azərbaycanın milli təhlükəsizliyinə cavabdeh olan Eldar Mahmudov və bir qrup MTN-in yüksək rütbəli şəxsləri vəzifə səlahiyyətlərindən sui-istifadə edərək quldurluq, soyğunçuluq, iş adamlarına qarşı qanunsuz tələbetmələr həyata keçirib. Onların fəaliyyəti uzun müddət araşdırılıb, dəfələrlə Eldar Mahmudova baş verənlərlə bağlı xəbərdarlıq edilib. Nazirə hətta konkret faktlar üzrə törədilən cinayətlərin arxasında onların durduğu ilə bağlı şübhələr çatdırılıb. Məsələ o yerə çatıb ki, prosesə Azərbaycanın prezidenti şəxsən müdaxilə etməli olub. Hətta Eldar Mahmudov ölkə başçısı İlham Əliyevə yalan danışmaqdan belə çəkinməyib.Sonda isə nazirin və ətrafındakı generalların cəzalandırılmasına qərar verilib.Q eyd edək ki, Azərbaycanın yaxın tarixi nazirlərin qalmaqallı şəkildə vəzifələrini itirməsi faktları ilə zəngindir. 
Xeberle.com xəbər verir ki, Qaynar.info belə faktlarla bağlı araşdırma hazırlayıb.
Surət Hüseynov 
Sabiq baş nazir Surət Hüseynov 1993-cü ildə Əbülfəz Elçibəyin qanuni hakimiyyətinə qarşı qiyam qaldırıb. Elçibəy vətəndaş müharibəsinin qarşısını almaq üçün hakimiyyətdən getməli olub. Gəncə qiyamından sonra hakimiyyətə gəlmiş Heydər Əliyev 1993-cü il iyunun 30-da verdiyi fərmanla Surət Hüseynovu baş nazir təyin edib.Amma Hüseynovun baş nazirliyi uzun sürməyib. O, dövlət çevrilişinə cəhddə ittiham edilib, 1994-cü il oktyabrın 6-da Milli Məclis üzvlüyündən azad edilib, oktyabrın 7-də isə baş nazir vəzifəsindən uzaqlaşdırılıb. Oktyabrın 14-də Milli Məclis onun cinayət məsuliyyətinə cəlb olunmasına, barəsində həbs qətimkan tədbiri seçilməsinə razılıq verilməsi və Azərbaycanın Milli Qəhrəmanı adından məhrum edilməsinin tövsiyə olunması haqqında qərar qəbul edib. S. Hüseynov həmin vaxt həbs olunsa da, həbsxanadan qaça bilmişdi. Azərbaycandan qaçıb getmiş sabiq baş nazir, Rusiyada həbs olunaraq məhkəmə qərarı ilə ömürlük həbs cəzasına məhkum edilmişdi. Qarabağ müharibəsində uğursuzluğun səbəblərindən biri də birbaşa Surət Hüseynovun fəaliyyətilə bağlanılır. Prezident İlham Əliyevin 2004-cü il 17 mart tarixli əfv fərmanı ilə həbsdən azad olunub.
Nəriman İmranov 
Sabiq milli təhlükəsizlik naziri Nəriman İmranov əslən Qərbi Azərbaycanın Basarkeçər rayonunun (indiki Ermənistan Respublikası) Şişqaya kəndindəndir. 1975-ci ildə Naxçıvan MR-da komsomolun 1-ci katibi vəzifəsindən SSRİ DTK-nın Ali məktəbinə oxumağa göndərilib. Məktəbi bitirdikdən sonra DTK orqanlarında fəaliyyət göstərib, 1986-cı il oktyabrın 4-də Azərbaycan DTK sədrinin müavini təyin edilib. 1988-1993-cü illərdə SSRİ təhlükəsizlik orqanlarında müxtəlif vəzifələrdə çalışıb. 1993-cü ilin mart ayında Bakıya qayıdıb. 1993-cü ilin iyun ayında AXC hakimiyyətinin süqutu nəticəsində iqtidara Heydər Əliyev gəlib. Qısa vaxt sonra, iyul ayının 3-də Nəriman İmranov milli təhlükəsizlik naziri vəzifəsinə təyin edilib. 1994-cü ilin may ayının 15-də ona general-mayor rütbəsi verilib.1994-cü il oktyabr ayının 15-də N.İmranov bir qrup şəxsin MTN-in təcridxanasından qaçırılmasının təşkilində iştirakda, vətənə xəyanətdə təqsirləndirilərək həbs olunub və ömürlük azadlıqdan məhrum edilib. O, həbsxanadan prezident İlham Əliyev tərəfindən buraxılıb. 2002-ci ildə prezident N.İmranovu əfv edilib.
Fikrət Yusifov 
Sabiq maliyyə naziri Fikrət Yusifov əslən Naxçıvan MR-nın Şərur rayonunun Danzik kəndindəndir. 1987-ci ildə Moskvada namizədlik dissertasiyası müdafiə edərək iqtisad elmləri namizədi alimlik dərəcəsi alan Yusifov, sonra Azərbaycan Dövlət İqtisad Universitetində müəllimlik fəaliyyətinə başlayıb. 1992-ci ilin sonlarınadək institutda dekan müavini vəzifəsində işləyən F.Yusifov oktyabr ayında Azərbaycan Respublikası maliyyə nazirinin birinci müavini vəzifəsinə təyin edilib. Heydər Əliyev hakimiyyətə qayıdışından sonra, 1994-cü ildə onu nazir postuna irəli çəkib. F.Yusifov 5 il maliyyə naziri kreslosunda əyləşib. Amma onu elə H.Əliyevin özü vəzifədən kənarlaşdırıb. Belə ki, 1999-cu ilin iyul ayında F.Yusifov prezident yanında iclasda sərt tənqid edilərək biabırçı şəkildə maliyyə naziri vəzifəsindən çıxarılıb. Onun adı 6 ildən sonra - 2005-ci ildə yenidən gündəmə gəlib. Sabiq nazir F.Yusifov hüquq-mühafizə orqanlarına ifadə verib ki, o vaxtki səhiyyə naziri Əli İnsanov, iqtisadi inkişaf naziri Fərhad Əliyev və "Azərkimya” istehsalat şirkətinin o vaxtki prezidenti Fikrət Sadıqov eks-spiker Rəsul Quliyevlə əlbir olaraq Azərbaycanda hakimiyyət çevrilişi etmək istəyiblər. Elə bu ifadələrindən sonra cəmiyyətdə ona antipatiya bir qədər də artıb. Həmin il onu da adları çəkilən şəxslərlə birgə həbs ediblər, 2 ildən çox həbsdə saxladıqdan sonra azadlığa buraxılıb. 2009-cu ildən Azərbaycanı tərk edərək Rusiyaya köçərək bizneslə məşğul olan Yusifov hazırda Azərbaycandadır və QHT yaradıb. 
Həsən Həsənov 
Sabiq xarici işlər naziri Həsən Həsənov hələ Kommunist Partiyasının zamanından yüksək vəzifələr tutub. O, Səbail Rayon Partiya Komitəsinin 1-ci katibi (1975-1978), Sumqayıt Şəhər Partiya Komitəsinin 1-ci katibi (1978-1979), Gəncə Şəhər Partiya Komitəsinin 1-ci katibi (1979-1981) vəzifələrində çalışıb.1981-1990-cı illərdə Azərbaycan Kommunist Partiyası Mərkəzi Komitəsinin ideoloji məsələlər üzrə, tikinti məsələləri üzrə, iqtisadiyyat məsələləri üzrə katib olub. Eks-prezident Ayaz Mütəllibov zamanında, 1991-1992-ci illərdə H.Həsənov Azərbaycan Respublikasının Baş naziri vəzifəsində çalışıb. AXC hakimiyyətə gələndən sonra o, Azərbaycan Respublikasının BMT-də ilk daimi nümayəndəsi təyin edilib və 1992-1993-cü illərdə bu vəzifədə çalışıb. Heydər Əliyev hakimiyyətə gələndən sonra H.Həsənov Bakıya çağırılaraq nazir postuna təyin olunub. Bu,1993-cü ilin sentyabrında baş verib. H.Həsənov düz 5 il Heydər Əliyev iqtidarının xarici işlər naziri olub. 1998-ci ilin fevralında H.Həsənov elə mərhum prezident tərəfindən nazir vəzifəsindən azad olunub. Buna səbəb isə həmin vaxt Azərbaycanda və ondan kənarda geniş rezonans doğuran qumar qalmaqalı idi. Bakının məşhur "Avropa” oteli ilə bağlı kazino skandalının hədsiz böyüməsi sonrası Həsən Həsənov "günah keçisi” hesab edildi və "qurbanlıq” seçildi. 
Tofiq Zülfüqarov
Digər bir sabiq xarici işlər naziri Tofiq Zülfüqarov Rusiyanın Rostov-Don şəhərində həkim ailəsində anadan olub, 1961-ci ildə ailəsi ilə birlikdə Bakıya köçüb. 1981-ci ildə Azərbaycan Dövlət Universitetinin Şərqşünaslıq fakültəsinin ərəb dili və ədəbiyyatı şöbəsini bitirib. 1985-1990-cı illərdə Azərbaycan Respublikası Elmlər Akademiyasının Şərqşünaslıq İnstitutunda çalışıb. Donra isə Azərbaycan EA Tarix İnstitutuna elmi işçi vəzifəsinə  keçib. 1988-ci ildə erməni-azərbaycanlı münaqişəsinin  yaranmasından sonra digər elmi işçilərlə birlikdə Azərbaycan KP  MK-nın ekspert-analitik qrupuna göndərilib. 1992-ci ildə T.Zülfüqarov Azərbaycan Respublikası Xarici İşlər Nazirliyinə işə götürülüb. Heydər Əliyev prezient seçiləndən sonra, 1994-cü ilin iyununda T.Zülfüqarov xarici işlər  nazirinin müavini təyin olunub. 1998-ci ilin yanvarında isə H.Əliyevin fərmanı ilə Tofiq Zülfüqarova fövqəladə və səlahiyyətli səfir ali  diplomatik rütbəsi verilib. Həmin il martın 5-də prezident onu xarici işlər naziri təyin edib. Azərbaycan  Respublikası  prezidenti H.Əliyevin 1998-ci il 26 oktyabr tarixli fərmanı ilə  T.Zülfüqarov yeni hökumətdə xarici işlər naziri vəzifəsini təkrarən tutub. Amma bir il sonra, 1999-cu ilin oktyabrında T.Zülfüqarov hakimiyyətdaxili ziddiyətlər səbəbindən xarici işlər naziri vəzifəsindən istefaya gedib. O vaxtki dövlət müşaviri Vəfa Quluzadə və Prezident Aparatının işlər müdiri Eldar Namazovla birgə istefa ərizəsi yazan Zülfüqarovun bu addımı geniş ajiotaj doğurub. Məlum istefa ərizəsinin əsas səbəbi kimi, hakimiyyətin Qarabağla bağlı təslimçi sülh sazişi imzalamasına hazırlaşması göstərilib.  
Əli İnsanov
Sabiq səhiyyə naziri Əli İnsanov. O, mərhum prezident Heydər Əliyevin ən inanılmış nazirlərindən biri sayılırdı. Əmək fəaliyyətinə Azərbaycan Elmi-Tədqiqat Vərəm İnstitutunda həkim-ordinator kimi başlayan Əli İnsanov sonralar vəzifə pilləsində tədricən yüksəlib. 1985-ci ildə həmin institutun direktoru olan Ə.İnsanov Heydər Əliyev hakimiyyətə gələndən sonra - 1993-cü ildə səhiyyə naziri vəzifəsinə təyin edildi. 1995-ci ildə isə Milli Məclisə deputat seçildi. Əməkdar elm xadimi olan sabiq nazir Azərbaycanın ilk dərman preparatı "İnsanovin"i hazırladı. O, Heydər Əliyev dövründə, 2001-ci ilin iyulunda Azərbaycan Milli Elmlər Akademiyasının həqiqi üzvü də seçildi. Əli İnsanov Heydər Əliyevin şəxsi həkimlərindən biri idi.Hakimiyyətə yeni prezidentin gəlişindən az sonra -  2005-ci ilin oktyabrında hakimiyyəti zorla ələ keçirmə ittihamı ilə həbs edilən Əli İnsanovun bir çox titulları, o cümlədən akademik fəxri adı geri alındı. Əvvəlcə dövlət çevrilişinə cəhdə hazırlıq ittihamı ilə həbs edilən sabiq nazir, daha sonra iqtisadi cinayətlərdə təqsirli bilindi. 2007-ci ilin aprel ayında İnsanov korrupsiya, vəzifə səlahiyyətlərini aşma ittihamı ilə əmlakı müsadirə olunmaqla 11 il azadlıqdan məhrumetmə cəzasına məhkum edilib. Avropa İnsan Haqları Məhkəməsi (AİHM) onun şikayətini qəbul edərək, azadlığa buraxılması barədə qərar çıxarsa da, Azərbaycan hakimiyyəti həmin qərarı yerinə yetirməkdən imtina edir.Ə.İnsanov hazırda 13 saylı cəzaçəkmə müəssisəsində cəza çəkir.
Fərhad Əliyev 
Sabiq iqtisadi inkişaf naziri Fərhad Əliyev 1990-1997-ci illərdə turizm, ticarət, inşaat, istehsalat sahəsində işləyən özəl şirkətlərə başçılıq edib. 2001-ci ildə iqtisadi inkişaf naziri nazir təyin olunub. 2004-cü ildən başlayaraq onun bir sıra iri məmurlarla, xüsusilə Kəmaləddin Heydərovla münasibətləri gərginləşib. 2005-ci il oktyabrın 19-da parlament seçkiləri ərəfəsində iqtisadi inkişaf naziri Fərhad Əliyev öz xidməti kabinetində həbs edilib. Ağır Cinayətlərə Dair İşlər üzrə Azərbaycan Respublikası Məhkəməsinin 2007-ci il 25 oktyabr tarixli hökmü ilə 10 il müddətinə azadlıqdan məhrum olunub. 14 oktyabr 2013-cü ildə prezidentin əfv sərəncamı ilə cəzanın çəkilməmiş hissəsindən azad edilib.