"Oktyabrın 7-dən Bakı Sumqayıt yolundakı baş vermiş sürüşmə hələ də davam edir". Bunu Ekologiya və Təbii Sərvətlər Nazirliyinin (ETSN) Milli Geoloji Kəşfiyyat Xidmətinin Geoloji planlama ekspedisiyasının baş geoloqu Ələmdar Piriyev açıqlamasında deyib. Məsələ ilə bağlı sürüşən ərazidə tikinti-bərpa işlərini aparan "AVRO-ASİYA İNŞAAT KORPORASİYASI "EVRASCON" Açiq Səhmdar Cəmiyyəti ilə də əlaqə saxladıq. Cəmiyyətin sədr müavini Vaqif Hacıyevin sözlərinə görə, ərazidə bərkitmə işləri hələ də davam etdirilir: "İlk gündən baş verən sürüşmə bərkitmə işləri aparandan sonra demək olar ki, tamamilə dayanıb. Sürüşmənin ilk günləri çatlar günə 2-3 sm. olurdu. Dəmir bəndlər qoyulandan sonra 3 gün ərzində 1 mm fərq var. Getdikcə, tam dayanacaq”.

Şirkət rəsmisinin onu da əlavə edib ki, hazırda avtovağzal kompleksi ilə yol arasındakı istnad divarına 80 metr uzunluğunda kənar vurulub: "Divarın üzünə suvaq vurulacaq. Ondan sonra dayaq rolunu oynayacaq divar tikiləcək. Bəzi hissələrinə metal dayaq vurulub. Arada qaraj olduğundan, bəzi hissəsi beton divarla bərkidiləcək. Suvaqdan sonra dəmirləmə işləri də ediləcək”.

Bakı-Sumqayıt yolunun çökməsi məsələsinə gəlincə V. Hacıyev belə bir təhlükənin gözlənilmədiyini qeyd edib: "Heç bir qorxusu yoxdu. Bərkidilmə işləri davam edir. Təxminən 10-15 gün ərzində işlər bitəcək”.

Baş verənlərlə bağlı hadisə yerinə yollandıq. Ərazi hasara alınmış, kənar şəxslərin içəri daxil olmasına qadağa qoyulmuşdu. Əyilən istinad divarının yerləşdiyi ərazidə isə qızğın iş gedirdi. Ərazinin mühafizə xidməti bunun təhlükəli olduğunu qeyd edərək, bizi daha yaxına buraxmadılar.

Qeyd edək ki, oktyabrın 7-də Bakı-Sumqayıt yolunda sürüşmə baş verib. Sürüşmə hadisəsi şəhər istiqamətində, Bakı Avtovağzal kompleksinin qarşısında qeydə alınıb.

Sürüşmə nəticəsində yolda istinad divarı əyilib, Avtovağzalın yola yaxın həyətində iri çatlar əmələ gəlib. Yolun Sumqayıtdan Bakıya gələn istiqamətdə yolun ortasında böyük çatlar yaranıb, yolun ortasından Avtovağzal istiqamətində qeyri-bərabər çökmə baş verib.(Lent.az)