May ayının 22-də şair Faiq Balabəyli yol polisi tərəfindən qanunsuz olaraq cərimələnib.

 Bu barədə AzNews.az-a şairin özü məlumat verib. O, polisin onunla əsassız iddialarla danışdığını və əmrə tabe olmamaqda günahkar hesab etdiyini söyləyib: “Dünən Neftçilər prospektində, “Park Bulvar”ı keçən kimi 10 YX 405 dövlət nömrə nişanlı yol polisi işarə etdi. Maşını saxladım. Sənədlərimi istədi, təqdim etdim. Çavuş rütbəli yol polisinin əməkdaşı mənə dedi ki, telefonla danışırdın. Mən ona dedim ki, telefonum suya düşüb, işləmir. Lakin telefon əlimdə olub, bunu danmıram. Amma o, heç nəyə fikir verməyib, israrla telefonla danışdığımı iddia etməyə başladı. Yanındakı leytenant rütbəli polis yoldaşı, mənim günahsız olduğumu söylədi, amma həmin şəxs heç nəyə fikir verməyərək, yenə də öz iddialarını səsləndirməyə başladı. 

Mənə dedi ki, ANS, AZTV-dən yazıram indi bir saytın müxbirindən qorxacam? Məni telefonla danışmaqda təqsirləndirən polis cəzanı 158.1 maddəsi ilə yazdı. Bu da ki stop nişanına, yaxud saxla əmrinə riayət etməməkdir. Yəqin Şəhər Yol Polisi və Respublika Yol Polisi rəhbərliyi suala düzgün cavab verə bilər. Görəsən, nəyə görə mən bir qanun pozuntusunda günahkar bilinib, digər pozuntu ilə cərimələndim?”