Keçmiş milli təhlükəsizlik naziri Eldar Mahmudov vəzifədən azad ediləndən bəri ilk dəfə dünən üzə çıxıb və qudası, Azərbaycan Beynəlxalq Bankının keçmiş prezidenti Cahangir Hacıyevin anasının yasında iştirak edib.

Eldar Mahmudov mərhumun dəfn mərasimində iştirak edib və bütün yas mərasimi boyu qudası C.Hacıyevin yanında dayanıb. Ancaq heç kimlə ünsiyyətdə olmayıb.Sabiq nazir fikirli və pərt görünüb.

Mərasimdə yüksək vəzifəli məmurların iştirak etmədiyi bildirilir.

Eldar Mahmudov vəzifədən qəfil azad olunandan sonra onun barəsində müxtəlif məlumatlar yayılmaqda idi. Bəzi mənbələr onun qeyri-rəsmi ev dustaqlığında olduğunu iddia edirdi.

Məlumatlara görə, Eldar Mahmudov hazırda Badamdardakı şəxsi iqamətgahında yaşayır.

İlham Əliyev oktyabr ayının 17-də Eldar Mahmudovun milli təhlükəsizlik naziri vəzifəsindən azad edilməsi barədə sərəncam imzalayıb. Hazırda Təhlükəsizlik Nazirliyinin rəhbər postu boşdur.

Prezidentin oktyabr ayının 20-də verdiyi sərəncamla isə Mədət Quliyev Azərbaycan Respublikası milli təhlükəsizlik nazirinin birinci müavini təyin edilib.

Milli Təhlükəsizlik naziri Eldar Mahmodov işdən çıxarıldıqdan iki gün sonra isə qudası- Beynəlxalq Bankın keçmiş rəhbəri Cahangir Hacıyev də Mütəşəkkil Cinayətkarlığa Qarşı Mübarizə İdarəsinə ("Bandotdel”) çağırılıb. 


Cahangir Hacıyev- Eldar mahmudovun qudası(virtualaz.org)